10-dekabrning asosiy yangiliklari — “Daryo” dayjestida.
Chevrolet Tracker dilerlik salonlarida bir necha kun ichida sotuvga chiqadi. avtomobil 2 ta komplektatsiyada sotuvga chiqariladi:
Chevrolet Tracker LT (1-pozitsiya) – 185 mln so‘m;
Chevrolet Tracker LTZ AT (2-pozitsiya) – 215 mln so‘m.
Bundan tashqari, 2018-yilning 10-dekabridan GM Uzbekistan kompaniyasi Chevrolet Tracker krossoveriga buyurtmalar qabul qilishni boshladi.
***
Jizzax viloyati Forish tumanidagi “Qo‘lba” MFY, “Ko‘hna bozor” qishlog‘ida yetti oy ichida aka-uka o‘zini osdi, uchinchi aka yurak xurujidan vafot etdi. Avval 1988-yilda tug‘ilgan E.M., so‘ng 1983-yilda tug‘ilgan E.M. o‘z joniga qasd qilgan. 1977-yilda tug‘ilgan M.A. esa yurak sohasidagi kasallik oqibatida vafot etgan.
***
Ijtimoiy tarmoqlarda va messenjerlarda yosh yigit Nukus shahrining markaziy maydonlaridan birida joylashgan “I love Nukus” (“Men Nukusni sevaman”) yozuvidagi “yurak”ni tepib sindirayotgani aks etgan surat tarqaldi. Ushbu surat huquq-tartibot organlari xodimlari e’tiborini tortdi, ular bir kecha-kunduzdayoq bezorining shaxsini aniqlab, uni qo‘lga oldi. Bezorining ishi sudga oshirilgan.
***
Qoraqalpog‘istonning Qonliko‘l tumani, “Jana qala” ovulida yashovchi Menlibay Babaqulov dalada qazish ishlarini olib borayotganda qadimgi ko‘zalarni topib oldi. Ikki kun davomida Menlibay bir joyning o‘zidan uzunligi 40 santimetr keladigan 20 dona ko‘zani qazib oladi. Bu hodisa haqida tuman hokimligiga xabar beradi. Lekin topilmaga qo‘ni-qo‘shnilardan boshqa hech kim qiziqish bildirmaydi.
***
Ijtimoiy tarmoqlarda Samarqand shahridagi hayvonot bog‘ida ichki ishlar organi xodimlari 3 ta sherni otib o‘ldirganligi to‘g‘risida xabarlar tarqaldi. Sherlar bo‘yicha tarqalgan xabarlar yuzasidan hayvonot bog‘i xodimi Akmal Mashrabov fikr bildirdi. Uning aytishicha, ijtimoiy tarmoqlardagi fotolar ikki yil oldin olingan. Voqea Samarqand tumanida sodir bo‘lgan. “Durbek” ko‘chma hayvonot bog‘idagi sherlar tashqariga chiqib ketgan. Ularni ushlashning iloji bo‘lmaganidan so‘ng so‘nggi chora sifatida o‘ldirilgan. Samarqand shahridagi hayvonot bog‘ida bunday holat bo‘lmagan.
Izoh (0)