10 декабрнинг асосий янгиликлари — «Дарё» дайжестида.
Chevrolet Tracker дилерлик салонларида бир неча кун ичида сотувга чиқади. автомобиль 2 та комплектацияда сотувга чиқарилади:
Chevrolet Tracker LТ (1-позиция) – 185 млн сўм;
Chevrolet Tracker LTZ АТ (2-позиция) – 215 млн сўм.
Бундан ташқари, 2018 йилнинг 10 декабридан GM Uzbekistan компанияси Chevrolet Tracker кроссоверига буюртмалар қабул қилишни бошлади.
***
Жиззах вилояти Фориш туманидаги «Қўлба» МФЙ, «Кўҳна бозор» қишлоғида етти ой ичида ака-ука ўзини осди, учинчи ака юрак хуружидан вафот этди. Аввал 1988 йилда туғилган Э.М., сўнг 1983 йилда туғилган Э.М. ўз жонига қасд қилган. 1977 йилда туғилган М.А. эса юрак соҳасидаги касаллик оқибатида вафот этган.
***
Ижтимоий тармоқларда ва мессенжерларда ёш йигит Нукус шаҳрининг марказий майдонларидан бирида жойлашган «I love Nukus» («Мен Нукусни севаман») ёзувидаги «юрак»ни тепиб синдираётгани акс этган сурат тарқалди. Ушбу сурат ҳуқуқ-тартибот органлари ходимлари эътиборини тортди, улар бир кеча-кундуздаёқ безорининг шахсини аниқлаб, уни қўлга олди. Безорининг иши судга оширилган.
***
Қорақалпоғистоннинг Қонликўл тумани, «Жана қала» овулида яшовчи Менлибай Бабақулов далада қазиш ишларини олиб бораётганда қадимги кўзаларни топиб олди. Икки кун давомида Менлибай бир жойнинг ўзидан узунлиги 40 сантиметр келадиган 20 дона кўзани қазиб олади. Бу ҳодиса ҳақида туман ҳокимлигига хабар беради. Лекин топилмага қўни-қўшнилардан бошқа ҳеч ким қизиқиш билдирмайди.
***
Ижтимоий тармоқларда Самарқанд шаҳридаги ҳайвонот боғида ички ишлар органи ходимлари 3 та шерни отиб ўлдирганлиги тўғрисида хабарлар тарқалди. Шерлар бўйича тарқалган хабарлар юзасидан ҳайвонот боғи ходими Акмал Машрабов фикр билдирди. Унинг айтишича, ижтимоий тармоқлардаги фотолар икки йил олдин олинган. Воқеа Самарқанд туманида содир бўлган. «Дурбек» кўчма ҳайвонот боғидаги шерлар ташқарига чиқиб кетган. Уларни ушлашнинг иложи бўлмаганидан сўнг сўнгги чора сифатида ўлдирилган. Самарқанд шаҳридаги ҳайвонот боғида бундай ҳолат бўлмаган.
Изоҳ (0)