Namanganda Konstitutsiya va Inson huquqlari deklaratsiyasi qabul qilingan sanalarga bag‘ishlangan anjuman bo‘lib o‘tdi

Namanganda jinoyat ishlari bo‘yicha viloyat sudi tashabbusi bilan milliy Konstitutsiyaning 26 yilligi va Inson huquqlari umumjahon deklaratsiyasi qabul qilinganining 70 yilligi munosabati bilan ilmiy-amaliy anjuman o‘tkazildi. Bu haqda “Daryo” muxbiri xabar bermoqda.

Anjumanda viloyatdagi huquq-tartibot idoralari, oliy o‘quv yurtlari, jamoat tashkilotlari vakillari, jinoyat ishlari bo‘yicha shahar-tuman sudlari raislari va sudyalari ishtirok etdi.

Tadbirda Namangan davlat universiteti ma’naviyat bo‘limi boshlig‘i Ibrohim Otamirzayevning “Inson huquqlari umumjahon deklaratsiyasi— insoniyat tinchligi va xavfsizligini ta’minlashda muhim hujjat”, jinoyat ishlari bo‘yicha viloyat sudining sudyasi Bumayram Bobomirzayeva “Konstitutsiya odil sudlovni ta’minlash, inson huquq va erkinliklarini muhofaza qilishning huquqiy asosi” mavzularida ma’ruzalar qildi.

— Konstitutsiyamiz va Inson huquqlari umumjahon deklaratsiyasini birlashtirib turuvchi asosiy xususiyatlardan biri ikki hujjatda ham inson huquq va erkinliklariga oliy qadriyat sifatida urg‘u berilganidir. Sudlar tomonidan ham keyingi yillarda ushbu omilga alohida e’tibor qaratilmoqda. Jumladan, jinoyat ishlari bo‘yicha viloyat sudi tomonidan joriy yilning 9 oyi davomida 34 nafar shaxs oqlandi, 507 kishi taraflarning yarashganligi munosabati bilan jinoiy javobgarlikdan ozod qilindi, — deydi sud raisi Davlatmirza Komilov.