Наманганда жиноят ишлари бўйича вилоят суди ташаббуси билан миллий Конституциянинг 26 йиллиги ва Инсон ҳуқуқлари умумжаҳон декларацияси қабул қилинганининг 70 йиллиги муносабати билан илмий-амалий анжуман ўтказилди. Бу ҳақда «Дарё» мухбири хабар бермоқда.
Анжуманда вилоятдаги ҳуқуқ-тартибот идоралари, олий ўқув юртлари, жамоат ташкилотлари вакиллари, жиноят ишлари бўйича шаҳар-туман судлари раислари ва судьялари иштирок этди.
Тадбирда Наманган давлат университети маънавият бўлими бошлиғи Иброҳим Отамирзаевнинг «Инсон ҳуқуқлари умумжаҳон декларацияси— инсоният тинчлиги ва хавфсизлигини таъминлашда муҳим ҳужжат», жиноят ишлари бўйича вилоят судининг судьяси Бумайрам Бобомирзаева «Конституция одил судловни таъминлаш, инсон ҳуқуқ ва эркинликларини муҳофаза қилишнинг ҳуқуқий асоси» мавзуларида маърузалар қилди.
— Конституциямиз ва Инсон ҳуқуқлари умумжаҳон декларациясини бирлаштириб турувчи асосий хусусиятлардан бири икки ҳужжатда ҳам инсон ҳуқуқ ва эркинликларига олий қадрият сифатида урғу берилганидир. Судлар томонидан ҳам кейинги йилларда ушбу омилга алоҳида эътибор қаратилмоқда. Жумладан, жиноят ишлари бўйича вилоят суди томонидан жорий йилнинг 9 ойи давомида 34 нафар шахс оқланди, 507 киши тарафларнинг ярашганлиги муносабати билан жиноий жавобгарликдан озод қилинди, — дейди суд раиси Давлатмирза Комилов.
Изоҳ (0)