Namangan shahridagi davlat maktabgacha ta’lim muassasalarida bolalarning sog‘lom ovqatlanishini tashkil etishning yangi tartibi bo‘yicha ilk eksperimentlar olib borilmoqda. Bu haqda O‘zA xabar berdi.
Prezidentning 2017-yil 9-sentabrdagi “Maktabgacha ta’lim tizimini tubdan takomillashtirish chora-tadbirlari to‘g‘risida”gi qaroriga ko‘ra, MTMga tadbirkorlik subyektlari bilan sifat talablari va sanitariya-gigiyena normalariga javob beradigan oziq-ovqat mahsulotlari va tayyor ovqat yetkazib berish bo‘yicha shaffof hamda soddalashtirilgan tizim yaratilishi belgilangan.
Namangan shahridagi 23-MTM “Madadkor ta’minot savdo” xususiy korxonasi bilan hamkorlikda faoliyat olib bormoqda. Ayni paytda muassasa oshxonasi mazkur korxona oshpazlari ixtiyoriga topshirildi. Taomlar turi kengayib, sifati qat’iy nazoratga olindi. Mazkur muassasada 10 guruhda 223 nafar o‘g‘il-qiz tarbiyalanadi. Ularga har kuni lavlagi, sabzi, pomidor, bodring kabi vitaminga boy mahsulotlardan salat hamda belgilangan me’yor bo‘yicha kunlik taomnoma asosida ovqat tayyorlab berilmoqda.
Izoh (0)