Ўзбекистонда Россия ҳудудида ҳамюртларини террорчи ташкилотлар сафига жалб этиш билан шуғулланиб келган бухоролик Санъат Тўқсоновга нисбатан ҳукм чиқарилди. Бу ҳақда «Podrobno.uz» хабар бермоқда.
У 2009 йили Бухоро шаҳар суди томонидан безорилиги учун судланган, бироқ ўша йилнинг ўзи амнистия туфайли жазодан озод қилинганди. Тўқсонов 2010 йилдан бошлаб Москвага қатнайди ва у ерда ёлланма ишчи бўлиб меҳнат қилади.
Орадан маълум вақт ўтгач у фаолиятини ўзгартиради ва ҳозирда жазони ўтаётган бухоролик Акрам Рустамов, Раҳмиддин Камолов ва бошқалар билан бирга яширин жиҳодчилар оқими йиғилишларида иштирок эта бошлайди. Меҳнат муҳожирлари, хусусан, Москвага Ўзбекистон ва қўшни республикадан келган ёшлар ўртасида экстремизм ғояларини тарғиб этади. Мусулмонларга кўмак бериш учун Сурияга боришга даъват қилади.
Санъат Тўқсоновнинг ноқонуний ҳаракатларига чек қўйиш мақсадида ДХХ Бухоро вилоят бошқармаси томонидан унга нисбатан жиноий иш қўзғатилди. Ҳорижлик ҳамкасблар билан ҳамкорликдаги тадбирлар давомида Тўқсонов Доғистоннинг Хасавюрт шаҳрида қўлга олинди ва Ўзбекистонга келтирилди.
У жиноят ишлари бўйича Бухоро вилоят суди қарори билан 5 йилга озодликдан маҳрум этилди.
Изоҳ (0)