Haj ziyoratiga navbatsiz ketish ilinjida bo‘lgan fuqarolar orasida qamoq jazosidan qaytganlarni ish bilan ta’minlayotganlar ham bor. Shuningdek, diniy ekstremizm bilan qamalib ozodlikka chiqqan fuqarolarning har biri bilan shaxsan uchrashib ularga doimiy ravishda yordam ko‘rsatib kelinmoqda. Bu haqda Toshkent shahar hokimligi matbuot xizmati xabar berdi.
“O‘zbekistonda Prezident tashabbusi bilan Jinoyat kodeksining 159-moddasi bilan jazoni o‘tash muddatlaridan qaytgan fuqarolarga yordam ko‘rsatishning qulay ko‘rinishi yo‘lga qo‘yildi”, —Toshkent shahar hokimining jamoat va diniy tashkilotlar bilan aloqalar bo‘yicha o‘rinbosari Shuhrat Turdiqulov.
“Sherzod 7 yil ozodlikdan mahrum etilgan edi. U bu yillar davomida o‘qishdan ajraldi, bir kasbning boshini tuta olmadi. U yo‘lidan adashib diniy oqimlarga qo‘shilib qolgan paytida O‘zbekistonning nufuzli universitetda tahsil olar edi. Toshkent shahar hokimligining jamoat va diniy tashkilotlar bilan aloqalar bo‘limi tavsiyasi va yordami bilan Sherzodning Jahon iqtisodiyoti va diplomatiya universitetida o‘qishi tiklandi. Uning 22 million so‘m miqdoridagi shartnoma pulini Haj safariga bir necha yillardan buyon navbat kutayotgan keksa yoshli fuqarolardan biri to‘lab berdi.
Yana bir sobiq mahbus Zokir o‘tgan yili 17 yillik jazo muddatini o‘tab oilasi davrasiga qaytgan edi. U bola-chaqasi, yaqinlari orasida bo‘lsa ham necha yillik umrini zoye ketgazgani tufayli na ishi va na bir sarmoyasi bor. Zokirga ham yillar davomida Haj ziyoratiga borishni orziqib kutib kelgan keksa fuqarolarimizdan biri yangi ish boshlashi uchun 15 million so‘m sarmoya berdi. Zokir 15 million so‘m bilan quyon fermasini ochdi. Boshida ming hadik bilan boshlagan ishi omadi kelib yaxshi daromad keltira boshladi. Bugun uning 30 tadan ortiq zotdor, har biri 2 million so‘m atrofida baholanuvchi quyonlari bor. Daromadi esa o‘sib bormoqda”, — deyiladi xabarda.
Shuningdek, Davron aka ham salkam 19 yil panjara ortida o‘tirib, ozodlikka chiqdi. Qamalgan vaqtida endigina atak-chechak qilib yura boshlagan farzandlari bugun oila quray demoqda. O‘g‘ilni uylash, qizni uzatish kerak. Ammo, Davron akaning ham na hunari va puli bor. Ustiga ustak ozodlikdan mahrum bo‘lgan davrida sog‘lig‘i bo‘yicha ham muammolar orttirgan edi. Ammo yurtimizda yaxshi odamlar ko‘p ekan Haj ziyorati orzusida bo‘lgan yoshi ulug‘ fuqarolardan biri unga yordam qo‘lini cho‘zdi. Davron kasalxonada yotib davolandi, haydovchilik kurslarida o‘qidi. Endilikda ko‘zida jarrohlik operatsiyalarini o‘tkazilishi kutilmoqda. Jazo muddatlarini o‘tab qaytgan birgina fuqaroni ham hunarli, ishli bo‘lishi, sog‘lig‘ini tiklanishi jamiyat uchun katta foyda. Ayniqsa, adashib bizga begona bo‘lgan g‘oyalar ta’siriga tushib qolgan fuqarolarni yana jamiyatga qaytishga yordam berish ularni chetlatib qo‘ymaslik juda muhim.
O‘zbekiston Prezident aynan shunday manfur g‘oyalar ta’sirida jamiyatdan uzoqlashgan kimsalarni qaytarib, ularga to‘g‘ri yo‘lni ko‘rsatib, hayotda o‘z o‘rnini topishga yordam ko‘rsatgan fuqarolar birinchilardan bo‘lib Haj ziyoratiga borishga loyiq ekanligini ta’kidlagan edi. Bugun bu usul samara bermoqda. Haj ziyorati orzusida navbat kutayotgan fuqarolar noilojlikda qolgan fuqarolarga yordam qilmoqda. Jamiyatda na ishi, na hunari va na puli bo‘lgan norozi fuqarolarning ko‘payishi yana jiddiyroq muammolarni keltirib chiqarishi aniq.
Toshkent shahar hokimligining jamoat va diniy tashkilotlar bilan aloqalar majmuasi tomonidan olib borilayotgan ishlar esa ijobiy natija bermoqda. Yordam qilganlar ham, undan foyda ko‘rganlar ham minnatdor. Imkon bo‘lsa uzoq muddat qamoq jazosini o‘tab qaytgan fuqarolarning har biriga shunday yordam ko‘rsatilishi va ularning o‘z hayot yo‘lini tiklashga ko‘mak bo‘lishi kerak.
Yuqorida qayd etilgan shaxslarning ismlari o‘zgartirilgan.
Izoh (0)