AQSh Kongressida komissiya qarshisida Shinjondagi uyg‘urlar uchun qayta tarbiyalash lagerida bo‘lib chiqqan xitoylik Mehrigul Tursun nutq so‘zladi, deb yozadi Tengrinews. Ayol mahbuslar ham jismoniy, ham ruhiy qiynoqqa solingan lagerda o‘tkazgan uch oy umri haqida gapirib berdi.
U derazasi yo‘q tor yerosti kamerasida o‘nlab mahbuslar bilan birga joylashtirilgani, yerda uxlash uchun joy yetmaganligi tufayli navbat bilan soatlab tik turib chiqqanlari, noma’lum dorilar va suyuqliklar ichirishgani, elektr toki yordamida qiynoqlarga solingani haqida so‘zlab berdi.
Bir necha yil avval Mehrigul Shinjondan Misrga o‘qishga ketib, o‘sha yerda turmush qurgan. 2015-yilda qarindoshlarini ziyorat qilish uchun yosh bolalari bilan Xitoyga kelganida, uni qo‘lga olishgan. Bolalarni onasidan ajratishgan, hatto ulardan biri vafot etgan.
Tursunni uch yil davomida Xitoydan chiqarishmagan, bir necha marta hibsga olishgan, tarbiyalash lagerida saqlashgan. 2018-yil yozida Xitoy hukumati uning mamlakatni tark etib, farzandlarini Misrga olib ketishiga ruxsat bergan, ammo o‘zining Shinjonga qaytib kelishini talab qilishgan. Qohiraga kelib, ayol amerikalik diplomatlar bilan bog‘langan, ular esa uning AQShga kelishini ta’minlab bergan.
Izoh (0)