Келгуси йилнинг биринчи ярмида Корея Республикаси Президенти Мун Чжэ Иннинг Ўзбекистонга ташрифи кутилмоқда. Олий даражадаги саммитга тайёргарлик кўриш доирасида 30 ноябрь куни «Ўзбекистон – Корея: келажакка назар» мавзусида семинар бўлиб ўтди. Бу ҳақда ЎзА хабар берди.
Ўзбекистон Республикаси Президенти ҳузуридаги Давлат бошқаруви академиясида ташкил этилган тадбирда икки мамлакатнинг тегишли вазирлик ва идоралари, илмий-тадқиқот, таҳлил марказлари вакиллари иштирок этди. Унда савдо-иқтисодий, инвестиция, транспорт-коммуникация каби соҳаларда ҳамкорлик истиқболлари муҳокама қилинди.
Анжуманнинг очилишида Ўзбекистон Республикаси Президенти ҳузуридаги Стратегик ва минтақалараро тадқиқотлар институти директори Владимир Норов, Ўзбекистон Республикаси Президенти давлат маслаҳатчиси, Давлат бошқаруви академияси ректори Рустам Қосимов, Корея Республикасининг Ўзбекистондаги Фавқулодда ва мухтор элчиси Квон Ён У, Ханьян университетининг Осиё-Тинч океани тадқиқотлар маркази директори Гу Хо Ём, Корея миллий дипломатия академиясининг ташқи ишлар ва миллий хавфсизлик институти директори Ким Ин Чул сўзга чиқди.
– Ўзбекистон ва Корея ўртасидаги ўзаро ишонч ва самимийлик руҳидаги ҳамкорлик барча соҳалар қатори мамлакатимизнинг иқтисодий тараққиётига ҳам муносиб ҳисса бўлиб қўшилмоқда, – деди В.Норов. – Бугунги кунда Корея томонидан мамлакатимизга киритилган инвестиция 7 миллиард АҚШ долларидан ортиқни ташкил қилмоқда. Мамлакатимизда ҳамкор томон сармояси иштирокида кўплаб корхоналар нефть-газ, кимё, машинасозлик, ахборот-коммуникация технологиялари, транспорт, логистика, туризм каби соҳаларда самарали фаолият юритмоқда.
Президент Шавкат Мирзиёевнинг 2017 йилда Жанубий Кореяга давлат ташрифи чоғида бўлиб ўтган олий даражадаги музокаралар натижасида савдо-иқтисодий, инвестиция, молия каби қатор йўналишларда 60 дан зиёд битим ва шартномалар имзоланганди. Уларнинг жами қиймати 10 миллиард АҚШ долларидан зиёд. Шундан 4,5 миллиард АҚШ доллари тўғридан-тўғри инвестиция улушига тўғри келади. Шу кунларда Кореянинг Evergreen Motors ва Posco-Daewoo cорпоратион компаниялари томонидан Наманганда «Hyundai-Namangan KD» заводини қуриш ишлари бошлаб юборилганини ўзаро келишувларнинг ижобий самаралари сифатида баҳолаш мумкин.
Семинарнинг биринчи ялпи сессияси Ўзбекистон – Корея сиёсий соҳадаги ҳамкорлигини янада ривожлантириш мавзусига бағишланди.
Сессияда икки давлат ўртасидаги ҳамкорлик тарихи, жорий ҳолати ва истиқболлари таҳлил қилинди.
Корея миллий дипломатия академияси департаменти Бош директори Ко Жа Намнинг таъкидлашича, икки томонлама муносабатларни янада ривожлантиришда савдо-иқтисодий, парламентлараро ҳамкорлик йўналишларида амалий ҳамкорликни янги босқичга олиб чиқиш лозим.
Навбатдаги сессия иқтисодий алоқалар, транспорт-логистика, энергетика, инновация, фан-таълим, маданият, гуманитар соҳалар бўйича ҳамкорлик масалалари муҳокамасига бағишланди.
Анжуман сўнггида иштирокчилар Ўзбекистон – Корея ўртасида кенг кўламли муносабатларни янада ривожлантириш, ҳамкорликнинг янги қирраларини очишга йўналтирилган эксперт кузатувларини давом эттиришга келишиб олди.
Изоҳ (0)