Nursulton Nazarboyev hayotdan norozi qozog‘istonliklarga qabristonga borib ko‘rishni maslahat berdi

Qozog‘iston prezidenti Nursulton Nazarboyev mamlakat hayot darajasidan norozi fuqarolarni “sharoit ancha yomonroq” bo‘lgan joylarga borib ko‘rishga chaqirdi. Bu haqda “Interfaks” xabar bermoqda.

“Biz ko‘pincha hayotdan noliymiz: hali u narsa yetishmaydi, hali bu narsa. Agar hayotdan juda qiynalib ketgan bo‘lsangiz, kasalxonalarga borib ko‘ring, juda bo‘lmasa, qabristonlarga borib ko‘ring. U yerda yotganlar sizdan ancha yomonroq holatda”, — deya maslahat berdi u.

Qozog‘iston rahbari so‘zlariga ko‘ra, mamlakat aholisi soppa-sog‘lom bo‘lishiga qaramay, muammolardan noliydi. “Qo‘l-oyog‘imiz but, ammo boshimizdagi sochni yulamiz: juda yomon bo‘ldi, deb”, — deya g‘azablandi Nazarboyev.

Uning aytishicha, o‘zini qo‘lga olish va ko‘p ishlash orqali barcha qiyinchiliklarni yengish mumkin. Respublika yoshlariga ham shu malakani o‘rgatish kerak, dedi davlat rahbari.