Hindistonda aborigenlar tomonidan o‘ldirilganligi taxmin qilinayotgan amerikalikni qidirish ishlari to‘xtatildi. Buni qabilaga zarar yetkazish xavfi bilan izohlashdi

27-noyabr kuni Hindiston hukumati amerikalik missioner Jon Chauning jasadini Shimoliy Sentinel orolidan qidirib topish va olib kelish bo‘yicha operatsiya to‘xtatilganini e’lon qildi, deb yozadi TJournal.

U tashqi dunyodan uzilib qolgan hududga noyabr o‘rtalarida tajovuzkor xatti-harakatlari bilan mashhur bo‘lgan mahalliy qabila — sentinelliklarga Iso Masih haqida gapirib berish maqsadida borgan.

Guvohlar qayd etishicha, u yetib kelganidan keyin ko‘p o‘tmay, qabila tomonidan o‘ldirilgan va sohilga ko‘milgan.

Tekshiruv boshlanganidan keyin yetti kun davomida hind politsiyasi aborigenlar (tub aholi)ga zarar yetkazmagan holda marhumning jasadini qaytarish ehtimolini o‘rgangan. Ammo orolga ekspeditsiya uyushtirishga ko‘plab antropologlar va olimlar qarshi chiqqan. Ularning aytishicha, bir kishining jasadini olib ketishga urinish noyob xalqning qisman yoki to‘liq yo‘q bo‘lib ketishiga olib kelishi mumkin.

Shimoliy Sentinel orolida yashovchi qabila, 2011-yilgi ma’lumotlarga ko‘ra, 40 kishidan iborat. Ular tashqi dunyo bilan aloqadan qochishi bilan tanilgan.