O‘zbekiston Respublikasi Davlat soliq qo‘mitasi tashabbusi bilan Bosh prokuratura, Bosh prokuratura huzuridagi Majburiy ijro byurosi bilan hamkorlikda videoselektor yig‘ilishi o‘tkazildi. Bu haqda “Daryo”ga Davlat soliq qo‘mitasi Jamoatchilik bilan aloqalar va huquqiy axborot bo‘limi xabar berdi.
Tadbir O‘zbekiston Respublikasi Prezidentining 2018-yil 27-iyuldagi “Tadbirkorlik subyektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari to‘g‘risida”gi Farmoni ijrosi doirasida amalga oshirilayotgan ishlar va Majburiy ijro byurosi bilan hamkorlikda soliq qarzlarini undirish yuzasidan olib borilayotgan chora-tadbirlar tahliliga bag‘ishlandi.
Videoselektorda qo‘mitaning tarkibiy tuzilmalari, Qoraqalpog‘iston Respublikasi, viloyatlar va tuman (shahar) Majburiy ijro byurosi boshqarmalari boshliqlari, davlat ijrochilari, viloyat davlat soliq boshqarmalari va inspeksiya xodimlari ishtirok etdi.
Ma’lum bo‘lishicha, joriy yilning o‘tgan davrida Bosh prokuratura huzuridagi Majburiy ijro byurosi va Davlat soliq qo‘mitasi hamkorligida tashkil etilgan tadbirlar jarayonida 1881,1 milliard so‘m miqdorida mablag‘ undirilib, bu ko‘rsatkich o‘tgan yilning ushbu davriga nisbatan 1134,4 milliard so‘mga oshgan. Shuningdek, 11,2 mingta qarzdorlarning 2,5 trillion so‘m qiymatidagi mol-mulklari, shundan 1441 ta bino va inshoot, 1618 ta transport vositalari va 11063 ta boshqa turdagi mulklar xatlandi.
Davlat soliq qo‘mitasining Soliq qarzini undirishni tashkil qilish boshqarmasi boshlig‘i Jahongir Rajabovning ma’lum qilishicha, farmonga asosan 111,6 ming nafar fuqaroning 664,1 milliard so‘mlik soliq qarzi ular tomonidan 2019-yilning 1-yanvariga qadar yakka tartibdagi tadbirkor sifatida ro‘yxatdan o‘tishi, faoliyatini tiklashi hisobiga kechilishi kutilmoqda. Bugungi kunda 27,4 ming nafar fuqaro tadbirkorlik faoliyatini qayta tiklashi, shuningdek, belgilangan tartibda ro‘yxatdan o‘tishi hisobiga ulardagi 471,2 milliard so‘mlik soliq qarzi hisobdan chiqarildi.
Yig‘ilishda hamkorlikdagi ishlarni tashkil etishda kamchiliklarga yo‘l qo‘ygan, natijaviy ko‘rsatkichlari past bo‘lgan viloyatlar va tuman davlat soliq xizmati organlari rahbarlariga nisbatan keskin e’tirozlar bildirilib, kamchiliklarni qisqa muddatlarda bartaraf etish yuzasidan aniq topshiriqlar berildi.
Izoh (0)