Nizomiy nomidagi Toshkent davlat pedagogika universitetida Turkiyaning Informascope kompaniyasi bilan hamkorlikda “SMART universitet” loyihasi amalga oshiriladi. Bu haqda Oliy va o‘tra maxsus ta‘lim vazirligi matbuot xizmati xabar berdi.
Joriy yilning 26-noyabr kuni universitet rektori Shavkat Sharipov va Informascope kompaniyasi boshqaruv direktori Quvanch Chinar ishtirokida mazkur loyihani amalga oshirish bo‘yicha muzokaralar bo‘lib o‘tdi.
Toshkent davlat pedagogika universitetida zamonaviy talablar darajasida “SMART universitet” elementlarini joriy etish bo‘yicha bir qator amalga oshirilishi lozim bo‘lgan vazifalar belgilab olindi. Jumladan,
- Universitetda foydalanishda bo‘lgan turli xil axborot tizimlari, kompyuter dasturlarini o‘zaro integratsiya qilish;
- Foydalanuvchilarni yagona identifikatsiya tizim orqali, istalgan joydan universitet resurslaridan foydalanishlarini yo‘lga qo‘yish;
- Bugungi kundagi qurilmalarga mos ilovalar yaratish evaziga mavjud tizimlardan, shuningdek axborot hamda o‘quv ta’limiy resurslardan foydalanish geografiyasini kengaytirish, foydalanuvchilarga qulaylik yaratish;
- Talabalar bilimini nazorat qilishning avtomatlashgan tizimini joriy etish;
- Bitiruv malakaviy ishlari, magistr PhD va DSc darajalarini olish uchun yozilgan dissertatsiyalarini, “plagiat”ga tekshirish avtomatlashtirilgan tizimini va birlamchi ma’lumotlar bazasini shakllantirish;
- “SMART” texnologiyalardan foydalanish bo‘yicha professor-o‘qituvchilar va talabalar bilimlarini doimiy oshirib borish, yangi texnologiyalarni ta’lim jarayoniga joriy etish bo‘yicha “master-klasslar” tashkil qilish.
Turkiyaning Informascope kompaniyasi nashr ishlari, shuningdek, kutubxona mahsulotlari va xizmatlari ko‘rsatuvchi xorijiy yirik va yetakchi kompaniya sanaladi. U o‘zining ko‘p yillik tajribasiga tayanib, jahon miqyosida informatsion ehtiyojlarni qondirishga qaratilgan keng qamrovli va individual yechimlar ishlab chiqadi.
Ma’lumot uchun, “SMART” ayni paytda texnologiya olamida keng qo‘llaniluvchi ibora bo‘lib, Specific (o‘ziga xos), Measurable (o‘lchab bo‘ladigan), Attainable (erishib bo‘ladigan), Relevant (dolzarb), Time-bound (aniq muddatli) so‘zlarining qisqartmasidan olingan.
Mazkur loyiha oliy ta’lim muassasasining o‘quv, ilmiy va boshqaruv jarayonlarini axborotlashtirishga qaratilgan ma’lumotlar bazalarini, axborot tizimlarini yaratish, ulardan foydalanish, xizmatlar ko‘rsatish hamda boshqa axborot tizimlari bilan integratsiya qilinadigan oliy ta’lim muassasasining “SMART universitet” yagona platformasining asosiy tamoyillarini belgilab beradi
Izoh (0)