“Andijon viloyatining Xo‘jaobod tumanida 13 yoshli qiz o‘zini hokimlik binosidan tashlab yuboribdi” mazmunidagi xabarlar internet nashrlari va ijtimoiy tarmoqlarda tarqalib, muhokamalarga sabab bo‘ldi. “Daryo” muxbiri Mirolim Isajonov ushbu holatga aniqlik kiritish maqsadida mazkur tumanga yo‘l oldi.
Andijon viloyati IIB huzuridagi Tergov boshqarmasidan olingan ma’lumotlarga ko‘ra, joriy yil 24-noyabrga o‘tar kechasi Xo‘jaobod tuman IIB xodimlari tomonidan tungi tadbir o‘tkazilgan. Tadbir davomida profilaktika inspektorlari kechki soat 00:20 lar chamasida Xo‘jaobod shahri, Uzunko‘cha ko‘chasidan o‘tib ketayotgan vaqtda tuman xokimligi binosining 3-qavatida musiqa ovozlari yangrayotganini eshitadi.
Ular yuqoriga chiqib, shovqin-suron jarang sochayotgan xona eshigini taqqilatadi. Ichkaridan spirtli ichimlik iste’mol qilgan 25 yoshli D.A. eshikni ochadi. Uning ortidan ikki nafar yigit — 23 yoshli A.Q, 22 yoshli M.T hamda 15 yoshli qiz N.T. shirakayf holatda chiqib, voyaga yetmagan hamrohlari — 13 yoshli qiz G.A. qo‘rqqanidan pastga o‘zini tashlab yuborganligini aytadi.
G.A. o‘sha zahotiyoq tuman markaziy shifoxonasiga yotqiziladi. Ayni paytda mazkur xolat yuzasidan tuman prokuraturasi tomonidan tergovga kadar tekshiruv xarakatlari olib borilmoqda.
Qizning hozirgi ahvoli qanday ekanligini bilish uchun tuman tibbiyot birlashmasi mutasaddilariga murojaat qildik. Ular tomonidan taqdim etilgan ma’lumotda qayd etilishicha, shu yilning 24-noyabr kuni soat 01:40 da tuman IIB xodimlari tez tibbiy yordam mashinasi chaqirtirgan va G.A. tuman tibbiyot birlashmasiga qarashli markaziy shifoxona shoshilinch tibbiy yordam bo‘limiga olib kelingan.
Unga bosh miya chayqalishi, ikkala qo‘li bilak sohasidan, chap qo‘l chig‘anoq bo‘g‘im sohasidan, burun suyagi va pastki jag‘ining yopiq sinishi, tana yumshoq to‘qimalarini lat yeyishi tashxisi qo‘yilgan. Bemor malakali shifokorlar nazoratida qat’iy reja asosida davolanmoqda. Uning hozirgi holati qoniqarli.
Surishtiruv davomida tuman hokimligining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha bo‘limi bosh mutaxassisi Fayzullo Abdurazzaqov hamda Yoshlar ittifoqi tuman Kengashi raisi Shohruhbek Hamdamovga sim qoqdik. Afsuski, ular murojaatimizga javob bergisi kelmay, paysalga soldi.
Qayta-qayta qo‘ng‘irog‘imizga oxiri tuman hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Rustambek Egamberdiyev javob berdi:
“Ko‘rgan bo‘lsangiz, ayni paytda tuman hokimligi binosida qurilish-ta’mirlash ishlari davom etyapti. Davlat tashkilotlari bo‘limlari ham turli binolarda vaqtinchalik faoliyat yuritmoqda. Ochig‘i, bu voqeani eshitib, avvalgiga ishonmadim. O‘sha kuni tong otgach, to‘g‘ri tuman shoshilinch tibbiy yordam bo‘limiga otlandim. G.A.ning onasi bilan suhbatlashib, uning holatini ko‘zdan kechirdim. Endigina 13 yoshni qarshilagan qizning ota-onasi ajrashib ketgan, oyisi kafeda ofitsiant bo‘lib ishlarkan. Shu oilada voyaga yetayotgan qizga ichim achishdi. Aslida ayrim OAVlarda yozilganidek, qiz o‘zini atay pastga tashlamagan. U yashirinish maqsadida parda ortiga berkinmoqchi bo‘lgan. Ammo tasodifan 3-qavatdan yiqilib tushgan. Bu voqea sabab deyarli har kuni yig‘ilishlar o‘tkazilyapti. Nosog‘lom oilada ulg‘ayayotgan yoshlar ro‘yxatini yanada kengroq va puxta shakllantirish kerakligi oydinlashib qoldi”.
Xullas, Xo‘jaobodda shunday gaplar. Ularga qanday baho berishga ham hayronsan. Aslida bunga hojat ham yo‘qdek. Hokimlikdek qo‘riqlanadigan, tumanning bosh idorasi bo‘lgan binoda shu voqea ro‘y bersa, ustiga-ustak, uning yosh “qahramonlari” tunda, mast holatda bo‘lsa, bunday ko‘ngilsizliklardan tashqari yana nimani ham kutish mumkin edi?
Izoh (0)