ДСҚ: 27 минг нафар фуқаро тадбиркорликни қайта тиклаши ҳисобига 471,2 млрд сўмлик қарзидан озод этилди

Ўзбекистон Республикаси Давлат солиқ қўмитаси ташаббуси билан Бош прокуратура, Бош прокуратура ҳузуридаги Мажбурий ижро бюроси билан ҳамкорликда видеоселектор йиғилиши ўтказилди. Бу ҳақда «Дарё»га Давлат солиқ қўмитаси Жамоатчилик билан алоқалар ва ҳуқуқий ахборот бўлими хабар берди.

Тадбир Ўзбекистон Республикаси Президентининг 2018 йил 27 июлдаги «Тадбиркорлик субъектларининг ҳуқуқлари ва қонуний манфаатларини ҳимоя қилиш тизимини янада такомиллаштириш чора-тадбирлари тўғрисида»ги Фармони ижроси доирасида амалга оширилаётган ишлар ва Мажбурий ижро бюроси билан ҳамкорликда солиқ қарзларини ундириш юзасидан олиб борилаётган чора-тадбирлар таҳлилига бағишланди.

Видеоселекторда қўмитанинг таркибий тузилмалари, Қорақалпоғистон Республикаси, вилоятлар ва туман (шаҳар) Мажбурий ижро бюроси бошқармалари бошлиқлари, давлат ижрочилари, вилоят давлат солиқ бошқармалари ва инспекция ходимлари иштирок этди.

Маълум бўлишича, жорий йилнинг ўтган даврида Бош прокуратура ҳузуридаги Мажбурий ижро бюроси ва Давлат солиқ қўмитаси ҳамкорлигида ташкил этилган тадбирлар жараёнида 1881,1 миллиард сўм миқдорида маблағ ундирилиб, бу кўрсаткич ўтган йилнинг ушбу даврига нисбатан 1134,4 миллиард сўмга ошган. Шунингдек, 11,2 мингта қарздорларнинг 2,5 триллион сўм қийматидаги мол-мулклари, шундан 1441 та бино ва иншоот, 1618 та транспорт воситалари ва 11063 та бошқа турдаги мулклар хатланди.

Давлат солиқ қўмитасининг Солиқ қарзини ундиришни ташкил қилиш бошқармаси бошлиғи Жаҳонгир Ражабовнинг маълум қилишича, фармонга асосан 111,6 минг нафар фуқаронинг 664,1 миллиард сўмлик солиқ қарзи улар томонидан 2019 йилнинг 1 январига қадар якка тартибдаги тадбиркор сифатида рўйхатдан ўтиши, фаолиятини тиклаши ҳисобига кечилиши кутилмоқда. Бугунги кунда 27,4 минг нафар фуқаро тадбиркорлик фаолиятини қайта тиклаши, шунингдек, белгиланган тартибда рўйхатдан ўтиши ҳисобига улардаги 471,2 миллиард сўмлик солиқ қарзи ҳисобдан чиқарилди.

Йиғилишда ҳамкорликдаги ишларни ташкил этишда камчиликларга йўл қўйган, натижавий кўрсаткичлари паст бўлган вилоятлар ва туман давлат солиқ хизмати органлари раҳбарларига нисбатан кескин эътирозлар билдирилиб, камчиликларни қисқа муддатларда бартараф этиш юзасидан аниқ топшириқлар берилди.