Buxoro viloyati davlat soliq boshqarmasi rahbariyati 4-sektor hududiga kiruvchi barcha mahalla va qishloq fuqarolar yig‘inlari faollari bilan yaqin hamkorlik ijobiy natijalarni berayapti, deb xabar beradi viloyat soliq boshqarmasi.
28-noyabr kuni ushbu sektor ishchi guruhi Kogon tumanidagi kam ta’minlangan, boquvchisini yo‘qotgan oilalar, nogironligi bor xonadonlarga yaqindan yordam berish maqsadida xayrli ishga qo‘l urdi.
E’tiborlisi, bu ishga shaxsan viloyat davlat soliq boshqarmasi rahbariyatining o‘zi bosh-qosh bo‘lib, yordamga muhtoj va kam ta’minlangan oilalarning ahvoli yaqindan o‘rganilib, ularga dastlabki moddiy yordamni ko‘rsatgan holda oziq-ovqat mahsulotlari beminnat berildi.
Hududdagi “Sarayon” MFY da ham 3700 ga yaqin aholi istiqmoat qiladi. Ushbu qishloqda o‘z mehnati bilan oyoqqa turib olgan o‘ziga to‘q aholi bilan bir qatorda afsuski, kam ta’minlangan oilalar ham mavjud. Sarayon MFY Sarayon qo‘rg‘oni 3-uyda yashovchi Mavjuda Hasanova mana bir necha yillardan buyon uch nogiron farzandlarini o‘zi katta qilib kelmoqda. Ushbu xonadonga viloyat davlat soliq boshqarmasi tomonidan ro‘zg‘or uchun kerakli bo‘lgan oziq-ovqat mahsulotlari berildi. Shu hududda yashovchi To‘xta Sa’dulayeva qarovchisi yo‘q 1-guruh nogironi.
“Men juda ham xursandman, bizni yo‘qlab kelganlaring uchun sizlardan minnatdorman. Meni har doim bayram arafalarida mahalla, qo‘ni-qo‘shni doim yo‘qlab turishadi. Mana bugun ham menga viloyat soliq boshqarmasi tomonidan oziq-ovqat mahsulotlarini berishdi, menga shunchalik yordam berayotganlaridan boshim osmonga yetdi”, — deydi To‘xta Sa’dullayeva.
Qarshilik ko‘chasi 83-xonadonda yashovchi Sevar Ernazarova xonadoniga ham yordam qo‘li cho‘zildi. Xonadon egasining ikki qiz farzandi ham 2-guruh nogironi. Ularga sektor tomonidan doimiy yordam berib kelinadi bu gal ham ularning oilasiga oziq-ovqat mahsulotlari berildi.
“Men 4-sektor rahbarlaridan minnatdorman. Ikki qizimni malakali shifokorlarga ko‘rsatish maqsadida Toshkent shahriga olib borishim kerak edi ammo borib kelishga mablag‘imiz yetarli emas edi, shu sababli sektorga murojaat qildim ular menga Toshkentga borib kelishimiz uchun yo‘l chiptasini olib berishdi. Bizga g‘amxo‘rlik qilganlaridan xursandman”, — deydi Sevar Ernazarova.
Izoh (0)