Avvalroq “Daryo” nashri “Samarqandlik tadbirkor Siyob bozori hududida tartib bo‘lishini istamoqda” sarlavhali maqola chop qilgan edi. Samarqand viloyati Davlat soliq boshqarmasi mazkur maqolada keltirilgan holatlarni o‘rganib, unga o‘z munosabatini bildirdi. Bu haqda “Daryo” muxbiri Farhod Norbo‘tayev xabar berdi.
Bugungi kunda Samarqand viloyat Davlat soliq boshqarmasi hamda shahar davlat soliq inspeksiyasi xodimlari tomonidan hududdagi bozorlar va savdo komplekslarida belgilangan tartibda davlat ro‘yxatidan o‘tish, qo‘shimcha xodim yollash qonun-qoidalarini tushuntirish ishlari olib borilmoqda. Shu kunga qadar o‘tkazilgan profilaktik suhbatlar natijasida 91 nafar fuqaro davlat ro‘yxatidan o‘tkazilib, tadbirkorlik faoliyatini yo‘lga qo‘ydi, 21 nafar fuqaro esa tadbirkorlik faoliyatini qayta tikladi. Tadbirkorlar tomonidan 43 nafar fuqaro yollanma xodim sifatida ro‘yxatdan o‘tkazildi.Belgilangan tartib-qoidalarga muvofiq, yakka tartibdagi tadbirkor yollanma xodimni ro‘yxatdan o‘tkazishi lozim. Ishchi xodim yollagan tadbirkor faoliyati yuzasidan boshqa tartibda ro‘yxatdan o‘tmaydi, yollanma ishchi xodim esa savdo-sotiq jarayonida bevosita ishtirok etishini ta’kidlash o‘rinli.Jismoniy shaxs faoliyat turidan kelib chiqqan holda ro‘yxatdan o‘tkazilishi va shunga mos ravishda soliqlarni to‘lashi lozim, shu sababli yakka tartibdagi tadbirkor faoliyat yuritishi uchun soliq to‘lovini kamroq to‘lashni maqsad qilgan, deb hisoblash ham noo‘rin.
Izoh (0)