Xorazm viloyat sudi tomonidan adashib aqidaparstlik g‘oyalariga berilgan shaxs kafillik xatiga asosan kechirildi

2018-yil 26-noyabr kuni jinoyat ishlari bo‘yicha Xorazm viloyat sudi raisi B.Umarov tomonidan Urganch axborot va kompyuter texnologiyalari kasb-hunar kolleji binosida ochiq sayyor sud majlisi o‘tkazildi. Bu haqda Jinoyat ishlari bo‘yicha Xorazm viloyat sudi “Daryo”ga ma’lum qildi.

1985-yil 14-fevral kuni Xorazm viloyatining Hazorasp tumanida tug‘ilgan J.G. diniy ekstremizm, aqidaparastlik g‘oyalari bilan yo‘g‘rilgan hamda diniy adovatni targ‘ib qiluvchi materiallarni Internet tarmog‘i orqali olib, tarqatib kelganlikda ayblangan.

Xususan, J.G. Rossiya Federatsiyasida ishlab kelish jarayonida, o‘ziga tegishli bo‘lgan telefoni yordamida Internet jahon axborot tarmog‘i orqali diniy ekstremistik va aqidaparastlik g‘oyalari bilan yo‘g‘rilgan va ushbu g‘oyalarni targ‘ib qiluvchi “Salafiylar” terrorchilik tashkilotining materiallarini, shu jumladan jamoat xavfsizligi va jamoat tartibiga tahdid soladigan ma’ruza va videoroliklarni qarindoshlariga jo‘natish orqali tarqatish bilan shug‘ullanib kelgan.

Sud hukmiga ko‘ra, J.G.ning aybiga iqrorligi, qilmishidan pushaymonligi, oilaviy ahvoli, muqaddam sudlanmaganligi, yashash joyidan ijobiy tavsiflanganligi hamda unga nisbatan ozodlikdan mahrum qilish bilan bog‘liq bo‘lmagan jazo tayinlashni so‘rab bergan kafolat xati inobatga olinib, J.G.ga O‘zbekiston Respublikasi JK 244¹-moddasi (Jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismining “g” bandi bilan JKning 57-moddasi qo‘llanilib, 4 yil muddatga ozodlikni cheklash jazosi tayinlanib, sud zalidan darhol qamoqdan ozod qilingan hamda unga nisbatan muayyan, ya’ni milliy, irqiy, etnik yoki diniy adovatni targ‘ib qiluvchi materiallarga ega bo‘lmaslik, shu jumladan Internet aloqa vositalaridan foydalanmaslik kabi taqiqlar belgilandi.

Ta’kidlanishicha, 2018-yilning 10 oyi davomida jinoyat ishlari bo‘yicha Xorazm viloyat sudlari tomonidanYoshlar ittifoqi, “Mahalla” xayriya jamoat fondi, xotin-qizlar qo‘mitasi va boshqa organlarning kafolat xatiga asosan 134 jinoyat ishi bo‘yicha 176 nafar shaxs sud zalida qamoqdan ozod etilgan.