O‘zA Namangan viloyati Kosonsoy tumanidagi nosoz yo‘llar haqida tanqidiy xabar e’lon qildi.
Tumanning Rovot, Navjartepa, Chindovul-Rovot, Qaytmas-Tergachi yo‘llaridagi nosozliklar kishi dilini xufton etadi. Har qadamda uchraydigan o‘nqir-cho‘nqirlar har qanday ulovni yutaman, deydi go‘yo, deyiladi xabarda.
Guliston-2 mahallasining bosh ko‘chasidagi yo‘lning holati ham o‘ta yomonligini avtotransport vositalari harakatidan yaqqol ko‘rish mumkin. “Qadoqlar”dan qochgan avtomobillar yo‘lning qatnov qismida emas, chetida bir amallab harakatlanishga majbur bo‘lmoqda.
Sa’diy Sheroziy nomidagi mahallaning bosh yo‘li, Hurriyat-2 mahallasining “Dukur” nomli hududidagi yo‘llar ahvoli yuqoridagilardan ikki chandon yomon bo‘lsa yomonki, aslo yaxshi emas.
Aholining aytishicha, goh-goh, erta bahorda, ba’zan yoz oylarida mazkur yo‘llar ta’mirlanar, lekin, hech qancha fursat o‘tmay yana eski holiga kelib qolar ekan.
Izoh (0)