Oliy Majlis Qonunchilik palatasi cpikeri Nurdinjon Ismoilov boshchiligidagi O‘zbekiston parlamenti delegatsiyasi a’zolari 27-noyabr kuni Qozog‘iston prezidenti Nursulton Nazarboyev bilan uchrashdi. Bu haqda palata matbuot xizmati xabar bermoqda.
Uchrashuv chog‘ida qayd etilganidek, keyingi vaqtda xalqlar o‘rtasida o‘zaro bordi-keldi faollashdi, yaqin qo‘shnichilik aloqalari mustahkamlandi. Joriy yil Qozog‘istonda O‘zbekiston yili deb e’lon qilingani ham ikki qardosh elning bir-biriga iliq munosabatidan darak beradi.
Qonunchilik palatasi spikeri Nurdinjon Ismoilov samimiy qabul uchun Nursulton Nazarboyevga minnatdorlik bildirar ekan, O‘zbekiston Prezidenti Shavkat Mirziyoyevning samimiy qutlovini yetkazdi. Keyingi ikki yil mobaynida O‘zbekiston va Qozog‘iston rahbarlarining siyosiy irodasi tufayli ikki tomonlama munosabatlar yangi bosqichga ko‘tarilganini qayd etdi.
Samimiy muloqot chog‘ida O‘zbekiston—Qozog‘iston munosabatlarini yangi bosqichga ko‘tarish, iqtisodiy hamkorlikni tomonlarning mavjud salohiyati darajasiga olib chiqish, bu borada, ayniqsa, parlamentlararo aloqalarni yanada kuchaytirishga doir masalalar yuzasidan fikr almashildi.
Izoh (0)