Chimkent shahrida Qozog‘iston – O‘zbekiston I mintaqalararo hamkorlik forumi o‘z ishini boshladi. Bu haqda O‘zA xabar bermoqda.
Forum ikki mamlakat vazirlik va idoralari rahbarlari, ishbilarmon doiralari vakillarini jamladi. Mamlakatlar hududlarining eksport salohiyati, O‘zbekistondagi yangi iqtisodiy zonalar istiqbollari, xorijiy investitsiyalarni jalb qilish masalalari qayta ko‘rib chiqildi.
Tadbir bir necha shu’ba majlislarida davom etdi. Qozog‘istonda O‘zbekiston yilining yakunlari bo‘yicha o‘tgan sessiyada turizmga investitsiya loyihalarini jalb etish va hamkorlikni chuqurlashtirish kabi masalalar muhokama qilindi.
Tadbir doirasida bo‘lib o‘tgan Qozog‘iston — O‘zbekiston biznes-forumi ishbilarmonlar kengashining II majlisida un va don mahsulotlari yetkazib berish, avtomobilsozlik yo‘nalishlarida ham memorandum imzolandi.
— Qozog‘istonda O‘zbekistonning savdo uylarini tashkil etish bo‘yicha taklif tushdi, — dedi O‘zbekiston savdo-sanoat palatasining birinchi o‘rinbosari Islom Jasimov. — Savdo uylari tadbirkorlar uchun yaxshi imkoniyat yaratadi. Shuningdek, bu taklif hamkorlikni kengaytirishga xizmat qilishini inobatga olgan holda takliflarni qo‘llab-quvvatladik. Ayrim kompaniyalarimiz o‘rtasida manfaatli bitimlar imzolandi. Savdo-sanoat palatasi tomonidan qabul qilingan qarorlarni amalga oshirish vazifalari belgilab olindi. Hamkorlikni kengaytirish yuzasidan ham qarorlar qabul qilindi.
Ayni shu yo‘nalishda Sirdaryo viloyati hokimligi bilan ham memorandum imzolandi.
—Bugungi forumda investorlar bilan muzakora olib borib, “Novopek” kompaniyasi bilan qiymati 8 million dollarga teng 2 ta loyiha kelishuviga erishdik. Bu loyihalarni 2019—2020-yillarda amalga oshirish rejalashtirilgan. Bundan tashqari, ikki tomonlama savdo uyini ochish bo‘yicha ham o‘rganishlar olib bormoqdamiz, — dedi Sirdaryo viloyati hokimining investitsiyalar bo‘yicha o‘rinbosari Avaz Xo‘jayev.
Qishloq xo‘jaligi borasidagi hamkorlik istiqbolini belgilovchi galdagi sho‘ba majlisi ikki mamlakatda qishloq xo‘jaligi va suv resurslaridan foydalanish masalalariga bag‘ishlandi. Agrosanoat kompleksida kooperatsiya hamkorligini rivojlantirish mavzusida tashkil qilingan amaliy seminarda qishloq xo‘jaligi mahsulotlarini yetishtirish va qayta ishlashning zamonaviy usullari, xalqaro me’yorlar bo‘yicha yakdil tizimni tashkil qilish istiqbollari, eksport bo‘yicha tranzit yo‘nalishlari, qadoqlash va sertifikatlashtirish amaliyoti masalalari atroflicha ko‘rib chiqildi.
Forumda o‘zaro savdo-investitsiyaviy, mintaqaviy va hududlararo iqtisodiy sheriklikni yanada rivojlantirish, mamlakatlarning savdo aylanmasi hajmini oshirish masalalari keng muhokama qilindi. Koperatsiya, ishlab chiqarish, sanoat, oziq-ovqat, to‘qimachilik, turizm, qishloq xo‘jaligi, energetika, transport-kommunikatsiya va boshqa sohalardagi hamkorlikni mustahkamlash istiqbollari yuzasidan fikr almashildi.
Qozog‘iston — O‘zbekiston I mintaqalararo hamkorlik forumida Qozog‘iston Bosh vazirining birinchi o‘rinbosari Asqar Mamin va O‘zbekiston Bosh vazirining birinchi o‘rinbosari Ochilboy Ramatov memorandum imzoladi.
Izoh (0)