Чимкент шаҳрида Қозоғистон – Ўзбекистон I минтақалараро ҳамкорлик форуми ўз ишини бошлади. Бу ҳақда ЎзА хабар бермоқда.
Форум икки мамлакат вазирлик ва идоралари раҳбарлари, ишбилармон доиралари вакилларини жамлади. Мамлакатлар ҳудудларининг экспорт салоҳияти, Ўзбекистондаги янги иқтисодий зоналар истиқболлари, хорижий инвестицияларни жалб қилиш масалалари қайта кўриб чиқилди.
Тадбир бир неча шуъба мажлисларида давом этди. Қозоғистонда Ўзбекистон йилининг якунлари бўйича ўтган сессияда туризмга инвестиция лойиҳаларини жалб этиш ва ҳамкорликни чуқурлаштириш каби масалалар муҳокама қилинди.
Тадбир доирасида бўлиб ўтган Қозоғистон — Ўзбекистон бизнес-форуми ишбилармонлар кенгашининг II мажлисида ун ва дон маҳсулотлари етказиб бериш, автомобилсозлик йўналишларида ҳам меморандум имзоланди.
— Қозоғистонда Ўзбекистоннинг савдо уйларини ташкил этиш бўйича таклиф тушди, — деди Ўзбекистон савдо-саноат палатасининг биринчи ўринбосари Ислом Жасимов. — Савдо уйлари тадбиркорлар учун яхши имконият яратади. Шунингдек, бу таклиф ҳамкорликни кенгайтиришга хизмат қилишини инобатга олган ҳолда таклифларни қўллаб-қувватладик. Айрим компанияларимиз ўртасида манфаатли битимлар имзоланди. Савдо-саноат палатаси томонидан қабул қилинган қарорларни амалга ошириш вазифалари белгилаб олинди. Ҳамкорликни кенгайтириш юзасидан ҳам қарорлар қабул қилинди.
Айни шу йўналишда Сирдарё вилояти ҳокимлиги билан ҳам меморандум имзоланди.
—Бугунги форумда инвесторлар билан музакора олиб бориб, «Новопэк» компанияси билан қиймати 8 миллион долларга тенг 2 та лойиҳа келишувига эришдик. Бу лойиҳаларни 2019—2020 йилларда амалга ошириш режалаштирилган. Бундан ташқари, икки томонлама савдо уйини очиш бўйича ҳам ўрганишлар олиб бормоқдамиз, — деди Сирдарё вилояти ҳокимининг инвестициялар бўйича ўринбосари Аваз Хўжаев.
Қишлоқ хўжалиги борасидаги ҳамкорлик истиқболини белгиловчи галдаги шўъба мажлиси икки мамлакатда қишлоқ хўжалиги ва сув ресурсларидан фойдаланиш масалаларига бағишланди. Agrosаноат комплексида кооперация ҳамкорлигини ривожлантириш мавзусида ташкил қилинган амалий семинарда қишлоқ хўжалиги маҳсулотларини етиштириш ва қайта ишлашнинг замонавий усуллари, халқаро меъёрлар бўйича якдил тизимни ташкил қилиш истиқболлари, экспорт бўйича транзит йўналишлари, қадоқлаш ва сертификатлаштириш амалиёти масалалари атрофлича кўриб чиқилди.
Форумда ўзаро савдо-инвестициявий, минтақавий ва ҳудудлараро иқтисодий шерикликни янада ривожлантириш, мамлакатларнинг савдо айланмаси ҳажмини ошириш масалалари кенг муҳокама қилинди. Коперация, ишлаб чиқариш, саноат, озиқ-овқат, тўқимачилик, туризм, қишлоқ хўжалиги, энергетика, транспорт-коммуникация ва бошқа соҳалардаги ҳамкорликни мустаҳкамлаш истиқболлари юзасидан фикр алмашилди.
Қозоғистон — Ўзбекистон I минтақалараро ҳамкорлик форумида Қозоғистон Бош вазирининг биринчи ўринбосари Асқар Мамин ва Ўзбекистон Бош вазирининг биринчи ўринбосари Очилбой Раматов меморандум имзолади.
Изоҳ (0)