O‘z joniga qasd qilgan o‘quvchi bolaning ismi — Mirafzal. Amakisi Xondamir Rasulovning aytishicha, “jiyanim xonada sinfdoshlari bilan bir-biriga qog‘oz otib o‘ynab o‘tirgan. Sinfga o‘qituvchi kirib qolgach, hamma aybni, tartibbuzarlikni jiyanimning bo‘yniga qo‘yishgan. Keyin sinfdoshlari jiyanimning yuziga tuflashgan”. Mirafzalning otasi ham shunday fikrda: “Bundan bir oy avval sinfxonada maktab direktori o‘rinbosari bo‘lgan paytda sinf rahbari o‘quvchilarga o‘g‘limning yuziga tupurishni buyurgan. Har kuni muttasil kamsitilishi tufayli o‘g‘lim maktabga borishni xohlamay qo‘ygandi”.
“Turon 24”ning aniqlashicha, Mirafzalning otasi 13-oktabr kuni jahl bilan maktabga kelib, qo‘shnilardan maktabda o‘g‘lining yuziga tuflashib, uni tahqirlashgani, bu ishlarga direktor o‘rinbosari bo‘sh bo‘lgani haqida eshitganini aytib o‘dag‘aylagan. So‘ng direktor o‘rinbosari bilan gaplashib chiqqach, maktab direktori Dilorom Tursunovaga qo‘ng‘iroq qilib, uzr so‘ragan, anglashilmovchilik bo‘lganini bildirib, uyiga qaytgan. Maktab jamoasi, Mirafzalning sinfdoshlari ota-onalari bildirgan fikrga ko‘ra, o‘quvchi maktabdagi kamsitilishlardan emas (bunday holatlar rostdan ham bo‘lganmi-yo‘qmi, aniqmas), balki o‘z uyidagi ahvoldan ko‘proq siqilgan, otasidan juda qo‘rqqan.
Masalan, maktabdagi ota-onalar majlislariga asosan Mirafzalning buvisi kelgan va nevarasi haqida biror kamchilik aytilsa, bu haqda Mirafzalning otasiga bildirmaslikni o‘qituvchilardan doim so‘ragan. O‘quvchining o‘zi ham u yoki bu ishni vaqtida qilmasa yoki xato qilsa, “Otam meni o‘ldiradi”, deb ko‘p marta takrorlagan. “Uning o‘limidan xabar topgach, qizimni yonimga chaqirib so‘radim. Nima bo‘lgandi, sinfdoshlar yuziga tuflaganlaring rostmi deya so‘radim. Qizim yuziga tuflamadik, hech kim uni kamsitgani yo‘q, dedi. Qayta-qayta so‘rayverganimdan keyin ko‘pincha otasi urishini, ko‘kargan joylarini sinfdoshlariga ko‘rsatishini aytdi”, — deydi o‘quvchilardan birining otasi Nuriddin Rahimov.
Ma’lum bo‘lishicha, bir muddat avval oilaning ho‘kizi, aftidan, Mirafzalning aybi bilan o‘lib qolgan. O‘shanda Mirafzal makkapoyaning ichiga kirib yashiringan, uni izlashayotganini bilsa-da, chiqmagan. «Chunki otasidan qo‘rqardi”, — deydi maktab oshxonasida ishlovchi ota-onalardan biri Shahnoza Baratova. “Ho‘kizi o‘lib qolganini eshitib, Mirafzaldan nima bo‘lganini so‘ragandim. Mirafzal: “Jonimga tegib ketgani uchun ho‘kizni o‘zim dori berib o‘ldirdim. Keyin makkajo‘xorining orasiga kirib yashirinib olib, qancha chaqirishmasin, ha demadim”, deya aytib bergan edi o‘shanda”, – deydi Dilorom Tursunova.
Mirafzalning ismi ochiqlanmasligini so‘ragan qarindoshlaridan birining so‘zlariga ko‘ra, u oldin ham yurib ketayotgan mashinaning tagiga o‘zini tashlamoqchi bo‘lgan. Buvisiga doim: “Men o‘lishim kerak”, degan gapni takror-takror aytib yurgan.
Ma’lumot uchun, ushbu holat yuzasidan Jinoyat kodeksining 103-moddasi 2-qismi “b” bandi (“voyaga yetmagan shaxsni o‘zini o‘zi o‘ldirish darajasiga yetkazish”) bilan jinoyat ishi qo‘zg‘atilgan (aybdor deb topilgan shaxs 7 yildan 10 yilgacha ozodlikdan mahrum etiladi).
Izoh (0)