Bugun, 10-noyabr kuni O‘zbekistonning birinchi mudofaa vaziri, iste’fodagi general-polkovnik Rustam Ahmedov 75 yoshni qarshiladi. Yubiley munosabati bilan Mudofaa vazirligi markaziy apparatida tantanali marosim bo‘lib o‘tdi. Bu haqda vazirlikm matbuot xizmati xabar berdi.
Bayram tadbirida O‘zbekiston Prezidenti tomonidan yo‘llangan tabrik maktubini O‘zbekiston Prezidenti huzuridagi Xavfsizlik kengashi kotibi Viktor Mahmudov o‘qib eshittirdi.
Shuningdek, iste’fodagi general-polkovnik Rustam Ahmedov O‘zbekistonda yashayotgan barcha millat va elatlar vakillari o‘rtasida do‘stlik, o‘zaro hamjihatlik va totuvlikni mustahkamlash ishida erishgan katta yutuqlari, O‘zbekiston xalqining boshqa mamlakatlar xalqlari bilan do‘stlik va har taraflama hamkorligini rivojlantirganligi uchun O‘zbekiston Prezidentining Farmoniga binoan “Do‘stlik” ordeni bilan mukofotlandi.
Tantanali marosimda MDHga a’zo mamlakatlardan vakillar, jumladan, Rossiyadan iste’fodagi general-leytenant Gennadiy Borisov, Qirg‘izistondan iste’fodagi general-mayor Risbek Mirzamatov, polkovnik Janibek Kaparov hamda polkovnik Erkin Osmanov ishtirok etib, yubiley egasini qutlug‘ 75 yosh bilan muborakbod etdi.
“Bugungi bayram uchun barchaga chuqur minnatdorchiligimni bildiraman. Yoshlarning, jumladan, harbiylarning ma’naviy salohiyatini oshirish, ularga zamon talablariga mos bilim va ko‘nikmalarni berish, biz kabi iste’fodagi harbiylarga Vatanimiz manfaatlari uchun yana xizmat qilish imkoniyatini yaratib berayotgan muhtaram Prezidentimizga rahmat aytib qolaman. Bugun menga topshirilgan “Do‘stlik” ordeni biz, faxriylarga berilayotgan yuksak e’tiborning namunasidir. Men bundan juda ham hursandman”, — deya o‘z minnatdorchiligini bildirdi Rustam Ahmedov.
Ana shunday bayram tadbiri Qurolli Kuchlar davlat muzeyida ham o‘tkazildi.
Rustam Ahmedov 1943-yilda Farg‘ona viloyatining Bog‘dod tumanida tug‘ilgan. Qo‘qon shahridagi Qishloq xo‘jaligini mexanizatsiyalashtirish va elektrifikatsiyalash texnikumini tamomlagan. 1962—1965 yillar davomida Toshkent oliy tank qo‘mondonlik bilim yurtida tahsil olgan.
Xizmat faoliyati davomida O‘zbekiston Mudofaa ishlari bo‘yicha vazir — milliy gvardiya qo‘mondoni (1991 yil), O‘zbekiston mudofaa vaziri (1992—1997 yy.), O‘zbekiston Favqulodda vaziyatlar vaziri (1997—1998 yy.) lavozimlarida xizmat qilgan.
2018-yilning yanvar oyida O‘zbekiston Prezidenti Shavkat Mirziyoyevning farmoniga asosan, mudofaa vazirining maslahatchisi etib tayinlangan va hozirgi kunda ushbu lavozimda faoliyat ko‘rsatmoqda.
Izoh (0)