Ўз жонига қасд қилган ўқувчи боланинг исми — Мирафзал. Амакиси Хондамир Расуловнинг айтишича, «жияним хонада синфдошлари билан бир-бирига қоғоз отиб ўйнаб ўтирган. Синфга ўқитувчи кириб қолгач, ҳамма айбни, тартиббузарликни жиянимнинг бўйнига қўйишган. Кейин синфдошлари жиянимнинг юзига туфлашган». Мирафзалнинг отаси ҳам шундай фикрда: «Бундан бир ой аввал синфхонада мактаб директори ўринбосари бўлган пайтда синф раҳбари ўқувчиларга ўғлимнинг юзига тупуришни буюрган. Ҳар куни муттасил камситилиши туфайли ўғлим мактабга боришни хоҳламай қўйганди».
«Turon 24»нинг аниқлашича, Мирафзалнинг отаси 13 октябрь куни жаҳл билан мактабга келиб, қўшнилардан мактабда ўғлининг юзига туфлашиб, уни таҳқирлашгани, бу ишларга директор ўринбосари бўш бўлгани ҳақида эшитганини айтиб ўдағайлаган. Сўнг директор ўринбосари билан гаплашиб чиққач, мактаб директори Дилором Турсуновага қўнғироқ қилиб, узр сўраган, англашилмовчилик бўлганини билдириб, уйига қайтган. Мактаб жамоаси, Мирафзалнинг синфдошлари ота-оналари билдирган фикрга кўра, ўқувчи мактабдаги камситилишлардан эмас (бундай ҳолатлар ростдан ҳам бўлганми-йўқми, аниқмас), балки ўз уйидаги аҳволдан кўпроқ сиқилган, отасидан жуда қўрққан.
Масалан, мактабдаги ота-оналар мажлисларига асосан Мирафзалнинг бувиси келган ва невараси ҳақида бирор камчилик айтилса, бу ҳақда Мирафзалнинг отасига билдирмасликни ўқитувчилардан доим сўраган. Ўқувчининг ўзи ҳам у ёки бу ишни вақтида қилмаса ёки хато қилса, «Отам мени ўлдиради», деб кўп марта такрорлаган. «Унинг ўлимидан хабар топгач, қизимни ёнимга чақириб сўрадим. Нима бўлганди, синфдошлар юзига туфлаганларинг ростми дея сўрадим. Қизим юзига туфламадик, ҳеч ким уни камситгани йўқ, деди. Қайта-қайта сўрайверганимдан кейин кўпинча отаси уришини, кўкарган жойларини синфдошларига кўрсатишини айтди», — дейди ўқувчилардан бирининг отаси Нуриддин Раҳимов.
Маълум бўлишича, бир муддат аввал оиланинг ҳўкизи, афтидан, Мирафзалнинг айби билан ўлиб қолган. Ўшанда Мирафзал маккапоянинг ичига кириб яширинган, уни излашаётганини билса-да, чиқмаган. «Чунки отасидан қўрқарди», — дейди мактаб ошхонасида ишловчи ота-оналардан бири Шаҳноза Баратова. «Ҳўкизи ўлиб қолганини эшитиб, Мирафзалдан нима бўлганини сўрагандим. Мирафзал: «Жонимга тегиб кетгани учун ҳўкизни ўзим дори бериб ўлдирдим. Кейин маккажўхорининг орасига кириб яшириниб олиб, қанча чақиришмасин, ҳа демадим», дея айтиб берган эди ўшанда», – дейди Дилором Турсунова.
Мирафзалнинг исми очиқланмаслигини сўраган қариндошларидан бирининг сўзларига кўра, у олдин ҳам юриб кетаётган машинанинг тагига ўзини ташламоқчи бўлган. Бувисига доим: «Мен ўлишим керак», деган гапни такрор-такрор айтиб юрган.
Маълумот учун, ушбу ҳолат юзасидан Жиноят кодексининг 103-моддаси 2-қисми «б» банди («вояга етмаган шахсни ўзини ўзи ўлдириш даражасига етказиш») билан жиноят иши қўзғатилган (айбдор деб топилган шахс 7 йилдан 10 йилгача озодликдан маҳрум этилади).
Изоҳ (0)