Joriy yilning oktabr oyining boshida Xalq ta’limi vazirligi hamda Respublika bolalar kutubxonasi tomonidan “Kitob bilan selfi” ko‘rik tanlovi e’lon qilindi. Bu haqda Termiz shahridagi 19-maktabning rus tili va adabiyoti fani o‘qituvchisi Ilhom Boymurodov “Daryo” ga xabar berdi.
Ushbu ko‘rik tanlov 25-oktabrga qadar davom etib, quyidagi talablar qo‘yilgan edi: Kutubxona yoki kitob ishtirokida selfi tayyorlash, ushbu selfiga kreativ nom berish, kitob yoki kutubxona haqida qiziqarli fikr topish.
Deyarli bir oy davom etgan ko‘rik tanlov juda qiziqarli va ko‘tarinki ruhda o‘tdi. Respublikaning barcha hududlaridan 12 yoshdan katta bo‘lgan odamlar rasmlarni jo‘nata boshladi. Rasmlar orasida Kitobxon oilalar, maktab o‘quvchilari, ARM xodimlarini ko‘rish mumkin edi.
26-oktabr kuni Respublika bolalar kutubxonasining xodimlari tomonidan ko‘rik tanlov g‘oliblari e’lon qilindi.
Unga ko‘ra 1-o‘rinni Qoraqalpogiston Respublikasi ARM xodimlari, 2-o‘rinni Toshkent shahar Shayxontohur tumaning 40-maktabning o‘quvchisi, 3-o‘rinni Qashqadaryo viloyati ARMning yosh kitobxoni egalladi. Quvonarlisi shundaki, Surxon vohasi kitobxonlari ham ushbu ko‘rik tanlovda ko‘tarinki kayfiyatda ishtirok etib, e’lon qilingan 8 ta nominatsiyalarning 3 tasida g‘alaba qozondi. “Eng chiroyli kutubxona aks etgan selfi” nominatsiyasida Jarqo‘rg‘on tumani ARM xodimlari, “Kitobxon oila kutubxonasi eks etgan selfi” nominatsiyasida Tohir Amirqulov oilasi va “Kutubxona yoki kitoblar haqida bildirilgan eng qiziqarli fikr” nominatsiyasida Termiz tumani 19-maktabning 11-sinf o‘quvchisi Eldorbek Qilichevlar g‘olib bo‘ldi.
Tashkilotchilar tomonidan g‘oliblarga 1-o‘rin uchun 2 000 000 so‘mlik kitoblar jamlanmasi, 2-o‘rin uchun 1 500 000 so‘mlik kitoblar jamlanmasi, 3-o‘rin uchun 1 000 000 so‘mlik kitoblar jamlanmasi va faxriy yorliqlar topshirildi, shuningdek nominatsiya g‘oliblari Sertifikat hamda kitob jamlanmalari sovg‘alari bilan taqdirlandi.
Izoh (0)