Жорий йилнинг октябрь ойининг бошида Халқ таълими вазирлиги ҳамда Республика болалар кутубхонаси томонидан «Китоб билан селфи» кўрик танлови эълон қилинди. Бу ҳақда Термиз шаҳридаги 19-мактабнинг рус тили ва адабиёти фани ўқитувчиси Илҳом Боймуродов «Дарё» га хабар берди.
Ушбу кўрик танлов 25 октябрга қадар давом этиб, қуйидаги талаблар қўйилган эди: Кутубхона ёки китоб иштирокида селфи тайёрлаш, ушбу селфига креатив ном бериш, китоб ёки кутубхона ҳақида қизиқарли фикр топиш.
Деярли бир ой давом этган кўрик танлов жуда қизиқарли ва кўтаринки руҳда ўтди. Республиканинг барча ҳудудларидан 12 ёшдан катта бўлган одамлар расмларни жўната бошлади. Расмлар орасида Китобхон оилалар, мактаб ўқувчилари, АРМ ходимларини кўриш мумкин эди.
26 октябрь куни Республика болалар кутубхонасининг ходимлари томонидан кўрик танлов ғолиблари эълон қилинди.
Унга кўра 1-ўринни Қорақалпогистон Республикаси АРМ ходимлари, 2-ўринни Тошкент шаҳар Шайхонтоҳур туманинг 40-мактабнинг ўқувчиси, 3-ўринни Қашқадарё вилояти АРМнинг ёш китобхони эгаллади. Қувонарлиси шундаки, Сурхон воҳаси китобхонлари ҳам ушбу кўрик танловда кўтаринки кайфиятда иштирок этиб, эълон қилинган 8 та номинацияларнинг 3 тасида ғалаба қозонди. «Энг чиройли кутубхона акс этган селфи» номинациясида Жарқўрғон тумани АРМ ходимлари, «Китобхон оила кутубхонаси экс этган селфи» номинациясида Тоҳир Амирқулов оиласи ва «Кутубхона ёки китоблар ҳақида билдирилган энг қизиқарли фикр» номинациясида Термиз тумани 19-мактабнинг 11-синф ўқувчиси Элдорбек Қиличевлар ғолиб бўлди.
Ташкилотчилар томонидан ғолибларга 1-ўрин учун 2 000 000 сўмлик китоблар жамланмаси, 2-ўрин учун 1 500 000 сўмлик китоблар жамланмаси, 3-ўрин учун 1 000 000 сўмлик китоблар жамланмаси ва фахрий ёрлиқлар топширилди, шунингдек номинация ғолиблари Сертификат ҳамда китоб жамланмалари совғалари билан тақдирланди.
Изоҳ (0)