Qashqadaryo viloyati G‘uzor tumanida joylashgan harbiy qismlardan birida tumandagi akademik litsey, kollej hamda umumta’lim maktab o‘quvchilari uchun “Ochiq eshiklar” kuni tashkil etildi. Bu haqda Mudofaa vazirligi matbuot xizmati “Daryo”ga ma’lum qildi.
Harbiy qismga ekskursiya uyushtirgan 300 nafarga yaqin o‘quvchi yoshlar harbiy texnika va qurol-yaroqlar, ularning texnik tavsiflari bilan tanishtirildi. Favqulodda holatlarda jarohat olganlarga birinchi yordam ko‘rsatish, hujum vaqtida turli manyovrlarni amalga oshirish, o‘zini himoya qilish bo‘yicha ma’lumotlar berildi.
Shu bilan bir qatorda yoshlar va muddatli harbiy xizmatchilar o‘rtasida vatanparvarlik ruhidagi she’r va qo‘shiqlar tanlovi o‘tkazildi, harbiy hizmatchilar tomonidanjangovor chiqishlar namoyish etildi. Tadbir davomida o‘z shijoati va tashabbuskorligini namoyish etgan o‘quvchilarga faxriy yorliq va esdalik sovg‘alari topshirildi.
Izoh (0)