Adliya vazirligi tomonidan joriy yilning 27-oktabr kuni tuman (shahar) davlat notarial idoralari xodimlari ishtirokida videkonferensiya shaklida o‘quv-seminar mashg‘uloti o‘tkazildi. Bu haqda “Daryo”ga Adliya vazirligi Jamoatlik bilan aloqalar bo‘limi xabar berdi.
O‘quv-seminar mashg‘uloti Davlat rahbarining 2018-yil 25-maydagi “Nizolarni oldini olishga qaratilgan institut sifatida notariat tizimini yanada takomillashtirish chora-tadbirlari to‘g‘risida”gi qarori ijrosini ta’minlash maqsadida o‘tkazilgan.
Adliya vaziri o‘rinbosari A. Toshqulov raisligida bo‘lib o‘tgan seminarda vazirlik mas’ul xodimlari tomonidan “Yuridik yordam va huquqiy xizmatlar ko‘rsatish tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi Qonuni, notariat sohasi bilan bir qator qonun hujjatlariga kiritilgan o‘zgartirish va qo‘shimchalar, ko‘chmas mulkning oldi-sotdi, ayirboshlash va hadya qilish bitimlarini idoralararo elektron hamkorlikni qo‘llagan holda notarial tasdiqlash tartibini amalga oshirishda yuzaga kelayotgan muammolar hamda ularni bartaraf etish tartibi haqida to‘xtatilib o‘tildi.
Seminarga taklif etilgan Bosh prokuraturasi huzuridagi Iqtisodiy jinoyatlarga qarshi kurashish departamentining mas’ul xodimi K.Zaripov notarial idoralar va advokatlik tuzilmalarida jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish bo‘yicha ichki nazorat qoidalari talablariga rioya etilishi haqida tushuntirishlar berib o‘tdi.
Shuningdek, Adliya vazirligi tomonidan ayrim tuman (shahar) davlat notarial idoralari faoliyatida o‘tkazilgan “sirli mijoz” hamda reyd tadbirlarida aniqlangan xato va kamchiliklarga kelgusida barham berish to‘g‘risida ogohlantirish berildi.
O‘quv-seminarida notarial amaliyotda vujudga kelayotgan dolzarb masalalar muhokama qilindi va respublika bo‘yicha bir xil amaliyotni joriy etish hamda qonun hujjatlari normalarini to‘g‘ri qo‘llash bo‘yicha tuman (shahar) davlat notarial idoralariga tavsiya va ko‘rsatmalar berildi.
Adliya vazirligi tomonidan mazkur turdagi o‘quv-seminar mashg‘ulotlari tasdiqlangan grafik-rejaga asosan doimiy ravishda o‘tkazib boriladi.
Izoh (0)