Ichki ishlar organlari xodimlari bayramida Farg‘ona shahar ichki ishlar organlari faoliyatini muvofiqlashtirish boshqarmasining yangi binosi foydalanishga topshirildi. Bu haqda “Daryo” muxbiri Azizjon Ermatov xabar berdi.
Binoning ochilish marosimiga bag‘ishlab o‘tkazilgan tantanali tadbirda viloyat hokimligi, ichki ishlar boshqarmasi hamda Farg‘ona shahar hokimligi rasmiylari, faxriylar, keng jamoatchilik vakillari ishtirok etdi.
“Farg‘ona shahar ichki ishlar bo‘limi negizida Ichki ishlar organlari faoliyatini muvofiqlashtirish boshqarmasi tashkil etilgan bo‘lib, o‘tgan vaqt mobaynida bu o‘zgarish o‘z samarasi berdi. Ichki ishlar organlari xalqqa yanada yaqinlashib, ko‘plab jinoyatlar sezilarli ravishda kamaydi. Yangi binoning ochilishi kasb bayramiga munosib tuhfa bo‘ldi”, – dedi Farg‘ona viloyati ichki ishlar boshqarmasi boshlig‘i Rahmatjon Mamatov.
Maxsus lenta qirqilib, binoning ramziy kaliti Farg‘ona shahar ichki ishlar organlari faoliyatini muvofiqlashtirish boshqarmasi boshlig‘iga topshirilgach, mehmonlar bu yerda yaratilgan shart-sharoitlar, yangi jihozlar, zamonaviy axborot-kommunikatsiya texnologiyalari bilan tanishdi.
Izoh (0)