Niderlandiya poytaxti Amsterdam shahrining o‘ziga xos tashrif qog‘oziga aylangan oq-qizil rangli I Amsterdam yozuvi tez orada yo‘q bo‘lishi mumkin. Shahar mehmonlarining suratga tushish uchun sevimli joyiga aylangan installyatsiyani “ommaviy turizm” ramzi sifatida demontaj qilish talab qilinmoqda. Bu haqda “RIA Novosti” xabar berdi.
GroenLinks koalitsiya partiyasi boshqa siyosiy partiyalar ko‘magida Amsterdam shahar kengashiga 2004-yilda Muzey maydonida, shuningdek, Sxipxol aeroportiga o‘rnatilgan ommabop installyatsiyani olib tashlash va shaharning bu shior ostidagi har qanday marketingini to‘xtatish talabi bilan murojaat qilgan. Siyosatchilarning fikriga ko‘ra, ommaviy turizmdan bo‘g‘ilayotgan shahar ortiq reklamaga muhtoj emas.
Turizm va kongresslar bo‘yicha Niderlandiya kengashining so‘nggi tadqiqotiga ko‘ra, mamlakatga sayyohlarning kelishi kutilganidan ko‘ra tezroq o‘smoqda. Yaqin yillarda Niderlandiyaga keladigan sayyohlar soni 50 foizga o‘sib, 2017-yildagi 40 million kishidan 2030-yilda 60 million kishiga yetadi.
ABN Amro bankining tadqiqoti ma’lumotlariga ko‘ra, joriy yilda Amsterdamning har bir aholisiga o‘n nafar sayyoh to‘g‘ri keladi.
Izoh (0)