IShID jangarilari tomonidan garovga olingan Suriyaning Suvayda provinsiyasida yashovchi ayollarni mamlakat qamoqxonasidagi IShID jangarilariga almashtirish bo‘yicha kelishuvga erishilgan. Bu haqda “RIA Novosti” xabar berdi.
Joriy yilning 25-iyulida xudkushlar tomonidan As-Suvayda shahriga va jangrilar tomonidan shu nomli provinsiyaning bir nechta qishlog‘iga uyushtirilgan hujumlar oqibatida 210 nafardan ortiq kishi halok bo‘lgan, 200 dan ortiq kishi jarohatlangan. IShID jangarilari provinsiyadan bir necha kishini garovga olgan va shu paytgacha ushlab turibdi. Parallel ravishda Suriya hukumati armiyasi As-Safo vulqoni yaqinida IShIDga qarshi harbiy operatsiya o‘tkazmoqda.
Ta’kidlanishicha, IShID tomonidan olti nafar garovga olingan ayol Suriya qamoqxonalaridan ozod qilinadigan 17 nafar IShID jangarisiga almashtiriladi.
Nashr manbasining so‘zlariga ko‘ra, asirlarni almashish vaqtida As-Safo vulqoni atrofida o‘t ochishni to‘xtatish rejimi o‘rnatiladi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)