Aleksandra Damiyen ismli fransiyalik ayol o‘zini 2015-yilda yuz bergan terakt jabrlanuvchisi qilib ko‘rsatgani uchun ikki yilga qamaldi. U politsiyachilarni aldagan va davlat imtiyozlari va moliyaviy yordamni qo‘lga kiritgan. Parijda 2015-yilning 13-noyabrida yuz bergan uchta teraktda 130 kishi halok bo‘lgan va 350 kishi jarohatlangan, deb yozmoqda TJournal.
Parijlik 33 yoshli ayol ikki yillik qamoq jazosiga hukm qilingan, biroq u qamoqda olti oyni o‘tkazadi, shundan keyin shartli ravishda muddatidan oldin chiqishi mumkin bo’ladi. Sudda ayol o‘z aybini tan olgan va to‘liq pushaymon ekanligini bildirgan.
2015-yilda Damiyen unga terrorchilar hujum qilgan vaqtda “Kariyon” kafesi oldida bo‘lganini aytgan. U “Parij uchun hayot” assotsiatsiyasiga qo‘shilgan va Terrorizm qurbonlarining kafolat jamg‘armasidan 20 ming yevro olgan. Isbot sifatida ayol qo‘lidagi avtomat zarbasidan qolgan chandiqni ko‘rsatgan, shuningdek, terakt qurbonlarining ramziy fotosessiyasida ham ishtirok etgan.
2016-yilda “Parij uchun hayot” jamg‘armasining bir nechta ishtirokchisi Damiyendan gumon qilib, politsiyaga murojaat qilgan. Ular ayol terakt kuni “Kariyon” yaqinida bo‘lmaganini, biroq keyingi bir necha kun davomida boshqa jabrlanganlar bilan kafe oldida suratga tushgani va intervyu berganini aytgan. Uning go‘yoki avtomat zarbasidan qolgan chandig‘i aslida kaytserfing bilan shug‘ullanishda olingan jarohatdan qolgan.
Izoh (0)