18-oktabr kuni O‘zbekistonda Rossiya eksport markazi ishbilarmonlik missiyasi o‘z ishini boshlaydi. Ushbu tadbir ikki davlat o‘rtasidagi ilk hududlararo hamkorlik forumi munosabati bilan o‘tkazilmoqda. Ishbilarmonlik missiyasi ochilishi arafasida Rossiya eksport markazi bosh direktori Andrey Slepnev O‘zA muxbiri savollariga javob berdi.
— Bugungi kun talabidan kelib chiqib, mamlakatlar o‘rtasidagi hamkorlikning qaysi yo‘nalishlarini ustuvor, deb hisoblaysiz?
— O‘zbekiston paxtasi, sarxil mevalari, sharqona shirinliklari va tansiq taomlari mamlakatning o‘ziga xos milliy brendi hisoblanadi. O‘zbekiston iqtisodiyotining boshqa muhim tarmog‘i — tog‘-metallurgiya majmuasiga kelsak, uning mahsuloti dunyo iqtisodiyotida ham muhim o‘rin egallaydi.
Rossiya bilan O‘zbekiston o‘rtasidagi ikki tomonlama savdo jadal sur’atlar bilan rivojlanib bormoqda: 2017-yilda uning hajmi 3,65 milliard dollarni, o‘sish sur’ati esa 2018-yilning 8 oyi mobaynida o‘tgan yilning mos davridagi ko‘rsatkichga nisbatan 30,3 foizni tashkil qildi. Shu bilan birga, Rossiyadan O‘zbekistonga import hajmi 40 foizga, O‘zbekistondan Rossiyaga eksport 8,6 foizga ortdi. 2018-yilda Rossiyadan O‘zbekistonga yuqori import sur’atlari mamlakatda amalga oshirilayotgan keng ko‘lamli qurilish ishlari bilan izohlanmoqda: yetkazib berilgan eksport tovarlarining asosiy qismi choksiz po‘lat quvurlar (+444,8 foiz), shuningdek, buldozer, ekskavator va yo‘l-qurilish mashinalari (+264,1 foiz) hissasiga to‘g‘ri kelmoqda.
Yuqorida qayd etilgan yo‘nalishlardan tashqari Rossiyaning alyuminiy va uning qotishmasidan tayyorlangan buyumlar, elektrotexnika tovarlari, shakar, taxta va yog‘och materiallariga ham yuqori talab saqlanib qolmoqda.
Xalqaro ekspertlarning fikricha, O‘zbekistonda yaqin yillar ichida yalpi ichki mahsulotning keskin — yiliga 6 foizgacha oshishi kuzatiladi. Rossiya O‘zbekiston iqtisodiyotini mustahkamlashdan manfaatdor: mamlakat qanchalik boy bo‘lsa, uning import qudrati ham ortib boradi, aholining iste’mol darajasi yuqori bo‘ladi, u ko‘proq sayohat qiladi. Ko‘pchilik o‘zbeklar rus tilini yaxshi bilgani, mamlakatlar madaniy meros sohasida mushtarak jihatlarga ega ekanidan kelib chiqib, Rossiya O‘zbekiston fuqarolari uchun asosiy sayyohlik marshrutlaridan biriga aylanishiga ishonchimiz komil.
— Rossiya eksport markazining Rossiya va O‘zbekiston o‘rtasidagi ikki tomonlama savdoni rag‘batlantirishdagi roli qanday?
— Rossiya eksport markazi (REM) jamoasining vazifasi mamlakatimiz kompaniyalari uchun yaratilayotgan sharoitlarni takomillashtirish, ularning eksport faoliyatini qo‘llab-quvvatlashni ta’minlash, tashqi bozorga olib chiquvchi yangi kanallar va birinchi navbatda O‘zbekiston singari muhim va istiqbolli bozorlarda xorijiy savdo hamkorlarimiz bilan o‘zaro aloqalarning yangi mexanizmini yaratishga ko‘maklashishdan iborat. Rossiya va O‘zbekiston o‘rtasidagi iqtisodiy hamkorlik rivojining ijobiy dinamikasi, Rossiya kompaniyalarining O‘zbekiston bozoriga chiqishga qiziqishi ortishi, Rossiya biznesida mavjud raqobatli va yuqori texnologik yechimlardan kelib chiqib, kompaniyalarimiz O‘zbekistonda loyihalarini amalga oshirishda ishonchli va tajribali hamkorlar sifatida chiqishga, REM esa o‘z navbatida, ularni bu borada barcha yo‘nalishda qo‘llab-quvvatlashga tayyor.
— O‘zbekistonda Rossiya eksport markazi vakolatxonasini ochish ko‘zda tutilmoqdami?
— O‘zbekistonda ochilishi rejalashtirilayotgan REM rasmiy vakolatxonasi o‘zaro munosabatlarni rivojlantirish yo‘lidagi qonuniy qadam bo‘lib, mamlakatlar biznesiga amaliy hamkorlikni mustahkamlash imkonini beradi. Rossiyaning ko‘pgina kompaniyalari istiqbolli va jadal rivojlanayotgan bozorga chiqishni ko‘zlamoqda, Rossiya eksport markazi ham ularga bu borada maksimal darajada ko‘mak ko‘rsatishga bel bog‘lagan. Biz joyida kompaniya mahsulot lineykasi, EKSAR va Roseksimbank mahsulotlari yordamida bitimlarni moliyalashtirish bo‘yicha to‘liq maslahatlar berishga qodir REM vakili ko‘magida Rossiya va O‘zbekiston kompaniyalari uchun samarali muloqot maydoni tashkil etishni rejalashtirmoqdamiz.
— Toshkent metallurgiya zavodi qurilishini moliyalashtirish bitimi haqida ham so‘zlab bersangiz...
— Roseksimbank (REM guruhiga kiradi) “Asaka“ ATB va “O‘zsanoatqurilishbank“ ATB bilan 10 yil muddatga umumiy qiymati 140 million yevrodan ortiq bo‘lgan kredit bitimlarini imzoladi. Bu mablag‘lar Toshkent metallurgiya zavodi qurilishiga yo‘naltiriladi. Qurilish bosh pudratchisi Rossiyaning “MetProm” kompaniyalar guruhi hisoblanadi. Toshkent metallurgiya zavodi qurilishi loyihasi doirasida “MetProm” kompaniyalar guruhi tomonidan asosiy ishlab chiqarish liniyalari va infratuzilma obyektlarini loyihalashtirish, texnologiya va uskunalar yetkazib berish, jamoani o‘qitish, uskunalarga kafolatli xizmat ko‘rsatish ishlari amalga oshirilmoqda.
— O‘zbekiston va Rossiya o‘zaro savdo masalalarida qanday xatarlarga duch kelmoqda?
— Rossiya va O‘zbekiston savdo aloqalari istiqboli cheksiz. Mamlakatlarimiz ikki tomonlama munosabatlarda duch kelayotgan barcha muammo va xatarlar konstruktiv va do‘stona muloqot yordamida muzokaralar orqali hal qilinadi. Uchinchi davlatlar tomonidan amalga oshiriladigan hech qanday tashqi bosim va nosog‘lom raqobat unsurlari O‘zbekiston va Rossiya munosabatlarini buzishga qodir emas. Rossiya va O‘zbekiston do‘stlik va o‘zaro manfaat tamoyillari asosida savdo hamkorlarini mustaqil ravishda tanlash huquqiga ega suveren davlatlar.
Izoh (0)