18 октябрь куни Ўзбекистонда Россия экспорт маркази ишбилармонлик миссияси ўз ишини бошлайди. Ушбу тадбир икки давлат ўртасидаги илк ҳудудлараро ҳамкорлик форуми муносабати билан ўтказилмоқда. Ишбилармонлик миссияси очилиши арафасида Россия экспорт маркази бош директори Андрей Слепнев ЎзА мухбири саволларига жавоб берди.
— Бугунги кун талабидан келиб чиқиб, мамлакатлар ўртасидаги ҳамкорликнинг қайси йўналишларини устувор, деб ҳисоблайсиз?
— Ўзбекистон пахтаси, сархил мевалари, шарқона ширинликлари ва тансиқ таомлари мамлакатнинг ўзига хос миллий бренди ҳисобланади. Ўзбекистон иқтисодиётининг бошқа муҳим тармоғи — тоғ-металлургия мажмуасига келсак, унинг маҳсулоти дунё иқтисодиётида ҳам муҳим ўрин эгаллайди.
Россия билан Ўзбекистон ўртасидаги икки томонлама савдо жадал суръатлар билан ривожланиб бормоқда: 2017 йилда унинг ҳажми 3,65 миллиард долларни, ўсиш суръати эса 2018 йилнинг 8 ойи мобайнида ўтган йилнинг мос давридаги кўрсаткичга нисбатан 30,3 фоизни ташкил қилди. Шу билан бирга, Россиядан Ўзбекистонга импорт ҳажми 40 фоизга, Ўзбекистондан Россияга экспорт 8,6 фоизга ортди. 2018 йилда Россиядан Ўзбекистонга юқори импорт суръатлари мамлакатда амалга оширилаётган кенг кўламли қурилиш ишлари билан изоҳланмоқда: етказиб берилган экспорт товарларининг асосий қисми чоксиз пўлат қувурлар (+444,8 фоиз), шунингдек, булдозер, экскаватор ва йўл-қурилиш машиналари (+264,1 фоиз) ҳиссасига тўғри келмоқда.
Юқорида қайд этилган йўналишлардан ташқари Россиянинг алюминий ва унинг қотишмасидан тайёрланган буюмлар, электротехника товарлари, шакар, тахта ва ёғоч материалларига ҳам юқори талаб сақланиб қолмоқда.
Халқаро экспертларнинг фикрича, Ўзбекистонда яқин йиллар ичида ялпи ички маҳсулотнинг кескин — йилига 6 фоизгача ошиши кузатилади. Россия Ўзбекистон иқтисодиётини мустаҳкамлашдан манфаатдор: мамлакат қанчалик бой бўлса, унинг импорт қудрати ҳам ортиб боради, аҳолининг истеъмол даражаси юқори бўлади, у кўпроқ саёҳат қилади. Кўпчилик ўзбеклар рус тилини яхши билгани, мамлакатлар маданий мерос соҳасида муштарак жиҳатларга эга эканидан келиб чиқиб, Россия Ўзбекистон фуқаролари учун асосий сайёҳлик маршрутларидан бирига айланишига ишончимиз комил.
— Россия экспорт марказининг Россия ва Ўзбекистон ўртасидаги икки томонлама савдони рағбатлантиришдаги роли қандай?
— Россия экспорт маркази (РЭМ) жамоасининг вазифаси мамлакатимиз компаниялари учун яратилаётган шароитларни такомиллаштириш, уларнинг экспорт фаолиятини қўллаб-қувватлашни таъминлаш, ташқи бозорга олиб чиқувчи янги каналлар ва биринчи навбатда Ўзбекистон сингари муҳим ва истиқболли бозорларда хорижий савдо ҳамкорларимиз билан ўзаро алоқаларнинг янги механизмини яратишга кўмаклашишдан иборат. Россия ва Ўзбекистон ўртасидаги иқтисодий ҳамкорлик ривожининг ижобий динамикаси, Россия компанияларининг Ўзбекистон бозорига чиқишга қизиқиши ортиши, Россия бизнесида мавжуд рақобатли ва юқори технологик ечимлардан келиб чиқиб, компанияларимиз Ўзбекистонда лойиҳаларини амалга оширишда ишончли ва тажрибали ҳамкорлар сифатида чиқишга, РЭМ эса ўз навбатида, уларни бу борада барча йўналишда қўллаб-қувватлашга тайёр.
— Ўзбекистонда Россия экспорт маркази ваколатхонасини очиш кўзда тутилмоқдами?
— Ўзбекистонда очилиши режалаштирилаётган РЭМ расмий ваколатхонаси ўзаро муносабатларни ривожлантириш йўлидаги қонуний қадам бўлиб, мамлакатлар бизнесига амалий ҳамкорликни мустаҳкамлаш имконини беради. Россиянинг кўпгина компаниялари истиқболли ва жадал ривожланаётган бозорга чиқишни кўзламоқда, Россия экспорт маркази ҳам уларга бу борада максимал даражада кўмак кўрсатишга бел боғлаган. Биз жойида компания маҳсулот линейкаси, ЭКСАР ва Росэксимбанк маҳсулотлари ёрдамида битимларни молиялаштириш бўйича тўлиқ маслаҳатлар беришга қодир РЭМ вакили кўмагида Россия ва Ўзбекистон компаниялари учун самарали мулоқот майдони ташкил этишни режалаштирмоқдамиз.
— Тошкент металлургия заводи қурилишини молиялаштириш битими ҳақида ҳам сўзлаб берсангиз...
— Росэксимбанк (РЭМ гуруҳига киради) «Асака« АТБ ва «Ўзсаноатқурилишбанк« АТБ билан 10 йил муддатга умумий қиймати 140 миллион евродан ортиқ бўлган кредит битимларини имзолади. Бу маблағлар Тошкент металлургия заводи қурилишига йўналтирилади. Қурилиш бош пудратчиси Россиянинг «МетПром» компаниялар гуруҳи ҳисобланади. Тошкент металлургия заводи қурилиши лойиҳаси доирасида «МетПром» компаниялар гуруҳи томонидан асосий ишлаб чиқариш линиялари ва инфратузилма объектларини лойиҳалаштириш, технология ва ускуналар етказиб бериш, жамоани ўқитиш, ускуналарга кафолатли хизмат кўрсатиш ишлари амалга оширилмоқда.
— Ўзбекистон ва Россия ўзаро савдо масалаларида қандай хатарларга дуч келмоқда?
— Россия ва Ўзбекистон савдо алоқалари истиқболи чексиз. Мамлакатларимиз икки томонлама муносабатларда дуч келаётган барча муаммо ва хатарлар конструктив ва дўстона мулоқот ёрдамида музокаралар орқали ҳал қилинади. Учинчи давлатлар томонидан амалга ошириладиган ҳеч қандай ташқи босим ва носоғлом рақобат унсурлари Ўзбекистон ва Россия муносабатларини бузишга қодир эмас. Россия ва Ўзбекистон дўстлик ва ўзаро манфаат тамойиллари асосида савдо ҳамкорларини мустақил равишда танлаш ҳуқуқига эга суверен давлатлар.
Изоҳ (0)