Toshkent shahridagi “Yoshlar ijod saroyida“ 17-oktabr kuni VIII Markaziy Osiyo savdo forumi o‘z ishini boshladi. Bu haqda O‘zA xabar bermoqda.
Tashqi savdo vazirligi va AQSh Xalqaro taraqqiyot agentligi (USAID) tomonidan qator tashkilotlar hamkorligida tashkil etilgan tadbirning ochilishida Bosh vaziri o‘rinbosari Nodir Otajonov, AQShning Janubiy va Markaziy Osiyodagi savdo ishlari bo‘yicha vakili yordamchisi Mark Linskott, USAID Markaziy Osiyo bo‘yicha mintaqaviy direktori Kristofer Edvards an’anaviy tarzda o‘tkazib kelinayotgan mazkur forum dunyo bo‘yicha 70 milliondan ziyod hamkor va biznes doiralar vakillarini o‘z atrofiga birlashtirishini ta’kidladi.
Forum Markaziy Osiyo mamlakatlarida raqobatbardoshlikni oshirish, savdo faoliyatini qo‘llab-quvvatlash, mavjud to‘siqlarni bartaraf etish, yangi ish o‘rinlari yaratish kabi maqsadlarga qaratilgan. Ushbu loyiha mintaqaning beshta mamlakatida meva-sabzavotchilik, turizm, transport va logistika sohalarini jadal rivojlantirish, ularning jahon bozoriga integratsiyalashuviga ko‘maklashish, eksportni har tomonlama qo‘llab-quvvatlashni nazarda tutadi.
Ushbu forum O‘zbekiston – Amerika Qo‘shma Shtatlari savdo-iqtisodiy hamkorligida yangi bosqich boshlangan joriy yilda mamlakatimizda o‘tkazilayotgani bilan ahamiyatlidir. “Savdo va investitsiyalarni rivojlantirishda yangi istiqbollar” mavzusida tashkil etilgan tadbirda 27 mamlakat — AQSh, Markaziy va Janubiy Osiyo, Yevropadan kelgan davlat va xususiy sektorning 2000 dan ziyod vakili qatnashmoqda.
Joriy yilning 9 oyi mobaynida O‘zbekistonning Markaziy Osiyo va qo‘shni Afg‘oniston bilan savdo aylanmasi hajmi 38,2 foizga oshdi. Jumladan, Tojikiston bilan o‘zaro savdo hajmi qariyb 60 foiz o‘sgan. Qozog‘iston va Qirg‘iziston bilan tovar ayirboshlash hajmi o‘tgan yilning shu davriga nisbatan 45 foizga ortgani O‘zbekiston iqtisodiyotining qo‘shni davlatlar bilan bir-birini to‘ldirish tamoyiliga asoslangan holda rivojlanayotganini ko‘rsatadi. Biroq hali ishga solinmagan imkoniyatlar ko‘p. Bugungi tashqi savdo hajmi mintaqa salohiyatiga to‘liq mos kelmaydi.
Mazkur forum ushbu jarayonda hamkorlikni yo‘lga qo‘yish, g‘oyalar almashish va yangi bozorlarga kirish imkonini beradigan masalalar yuzasidan atroflicha fikr almashish uchun qulay sharoit yaratadi.
Sho‘ba majlislarida davom etgan forumda mintaqada ishlab chiqarishni moliyalashtirish uchun muqobil kapital manbasini topish, turizmni yanada rivojlantirishda ijtimoiy media va raqamli infratuzilmaning ahamiyati, Jahon savdo tashkilotiga a’zo bo‘lishdagi afzalliklar kabi muhim masalalar atroflicha muhokama qilindi.
Markaziy Osiyo savdo forumi doirasida savdo ko‘rgazmasi ham tashkil qilindi. Unda O‘zbekiston, Qozog‘iston, Qirg‘iziston, Tojikiston, Turkmaniston, Afg‘oniston, Pokiston, shuningdek, AQSh, Italiya, Niderlandiya, Yaponiya, Germaniyaning turli tarmoqlar, jumladan, transport, turizm, axborot texnologiyalari, asbob-uskunalar ishlab chiqarish, meva-cabzavot yetishtirish va qayta ishlash korxonalari, kompaniya va firmalarning 100 dan ziyod vakili ishtirok etmoqda.
Izoh (0)