Александра Дамиьен исмли франциялик аёл ўзини 2015 йилда юз берган теракт жабрланувчиси қилиб кўрсатгани учун икки йилга қамалди. У полициячиларни алдаган ва давлат имтиёзлари ва молиявий ёрдамни қўлга киритган. Парижда 2015 йилнинг 13 ноябрида юз берган учта терактда 130 киши ҳалок бўлган ва 350 киши жароҳатланган, деб ёзмоқда TJournal.
Парижлик 33 ёшли аёл икки йиллик қамоқ жазосига ҳукм қилинган, бироқ у қамоқда олти ойни ўтказади, шундан кейин шартли равишда муддатидан олдин чиқиши мумкин бўлади. Судда аёл ўз айбини тан олган ва тўлиқ пушаймон эканлигини билдирган.
2015 йилда Дамиьен унга террорчилар ҳужум қилган вақтда «Кариён» кафеси олдида бўлганини айтган. У «Париж учун ҳаёт» ассоциациясига қўшилган ва Терроризм қурбонларининг кафолат жамғармасидан 20 минг евро олган. Исбот сифатида аёл қўлидаги автомат зарбасидан қолган чандиқни кўрсатган, шунингдек, теракт қурбонларининг рамзий фотосессиясида ҳам иштирок этган.
2016 йилда «Париж учун ҳаёт» жамғармасининг бир нечта иштирокчиси Дамиьендан гумон қилиб, полицияга мурожаат қилган. Улар аёл теракт куни «Кариён» яқинида бўлмаганини, бироқ кейинги бир неча кун давомида бошқа жабрланганлар билан кафе олдида суратга тушгани ва интервью берганини айтган. Унинг гўёки автомат зарбасидан қолган чандиғи аслида кайцерфинг билан шуғулланишда олинган жароҳатдан қолган.
Изоҳ (0)