Фарғона вилоятининг Бешариқ туманидан бўлган Р. Қодирова олдин фирибгарлик жиноятини содир этиб, 4 маротаба судланганига қарамай Фурқат туманида яшовчи 8 нафар фуқаронинг 111 миллион сўмдан зиёд маблағини ўзлаштириб юборди. Бу ҳақда «Дарё» мухбири Азизжон Эрматов хабар берди.
Шу йилнинг март ойида Р.Қодирова Фурқат тумани Қушчи қишлоғида яшовчи Ш.Қ.нинг хонадонига бориб, ўзини улгуржи мош савдоси билан шуғулланувчи шахс сифатида таништирган. Ш.Қ.ни алдаб, унга тегишли бўлган 12 656 700 сўмлик 3 тоннадан зиёд мошни пулини 10 кун ичида беришини айтиб, олиб кетган. Мошни бошқа бир савдогарга сотиб, тушган пулларни ўз эҳтиёжи учун сарфлаб юборган.
Жиноят ишлари бўйича Фурқат туман судидан маълум қилишларича, уддабурон аёл шу тариқа мош «операцияси» орқали 8 нафар фуқарога 111 миллион сўмдан зиёд моддий зарар етказган.
Суд Р.Қодировага жазо тури ва меъёрини тайинлашда унинг айбига тўлиқ иқрорлигини, чин кўнгилдан пушаймонлигини, аёллигини, қарамоғида 2 нафар фарзанди борлигини, оилавий шароитини, жиноят натижасида етказилган зарарлар қопланмаганини, жабрланувчиларнинг қонуний чора кўриш ҳақидаги талабини инобатга олди. Суд ҳукми билан унга 5 йил-у 2 ой муддатга озодликдан маҳрум қилиш жазоси тайинланди. Шунингдек, прокурор даъвоси қаноатлантирилиб, Р.Қодировадан 8 нафар жабрланувчи фойдасига 111 миллион 715 минг сўм моддий зарар ундириш белгиланди.
Изоҳ (0)