Islom Karimov nomidagi Respublika xayriya jamoatchilik fondi Facebook’dagi sahifasiga Birinchi Prezidentning otasi — Abdug‘ani bobo haqidagi ma’lumotni joyladi.
“Islom Karimovning padari buzrukvori Abdug‘ani bobo 1894-yilda tug‘ilganlar.
Abdug‘ani bobo butun umr xizmatchi bo‘lib ishlagan va o‘zlariga ham, boshqalarga ham qattiqqo‘l, talabchan inson edilar.
Soqolini qirtishlab olib, etigini yarqiratib moylab yurishga odatlangan Abdug‘ani bobo avvalo o‘zlari qat’iy intizom va tartib-qoidaga rioya etar, farzandlaridan ham shuni talab qilar edilar. Mahalla-ko‘yning ehtiromini qozongan inson bo‘lganlar.
Abdug‘ani bobo va Sanobar aya farzandlari bilim olishga intilishi va kamolga yetishi uchun zarur sharoit, muhitni yaratgan edilar.
Pirovardida Karimovlar oilasida barcha o‘g‘il farzandlar oliy ma’lumot oldi, ulardan uch nafari maktabni oltin medalga bitirdi, uch nafari fan nomzodi bo‘ldi – Ibod G‘aniyevich, Quddus G‘aniyevich va Islom Abdug‘aniyevich. Bu – o‘sha davr uchun ham, bugungi kun uchun ham kamyob hodisadir. Keyinroq Islom Karimov akademik darajasini oldilar.
Barcha aka-ukalar juda kuchli xotiraga ega edilar. Bu qondan qonga o‘tib kelgan fazilat bo‘lsa ajab emas. Aka-ukalar o‘zaro musobaqalar o‘tkazishar edi, masalan, biror matn o‘qilib, uni yoddan aytib berish borasida bellashilar edi. Keyinroq aka-ukalardan biri oliy o‘quv yurti o‘qituvchisi, biri sudya, boshqalari xizmatchi, olim va ... Prezident bo‘ldi.
Ziyoli bu oilada o‘g‘illarning munosib ta’lim olishiga birlamchi vazifa sifatida e’tibor qaratilgan edi. Vaqtning o‘zi bu hayotiy tutum qanchalar to‘g‘ri bo‘lganini ko‘rsatdi”, — deyiladi xabarda.
Izoh (0)