Davlat xizmatlari agentligining Navoiy viloyati boshqarmasi bosh maslahatchisi Farruh Ro‘ziyev “Daryo” tahririyatiga “Yermulkkadastr” tashkiloti faoliyatida yo‘l qo‘yilgan kamchiliklar xususidagi maqolasini taqdim etdi. Quyida ushbu maqola e’tiboringizga havola etiladi.
Tarixga nazar tashlaydigan bo‘lsak, odamzot ibtidoiy jamoa davridan yer-joy, mol-mulk uchun talashgan. Davrlar o‘tib insondagi bu xohish kuchaysa kuchaydiki, so‘nmadi. Mayli, o‘tmishni qo‘yib turaylik. Yurtimizda mustaqillikning ilk davrlarida ham o‘zboshimchalik bilan imorat solib unda bola-chaqa ortirib, bir necha o‘n yillab yashagan odamlar kam bo‘lmadi. Ular hozir ham bor. Biroq, har bir qilingan amal ortida qonunlarga itoatkorlik hissi bo‘lishi lozim. Ammo, hukumatimiz yanayam odil, yurtboshimiz insonparvar.
Prezidentning “Fuqarolarni ijtimoiy qo‘llab-quvvatlash bo‘yicha qo‘shimcha chora-tadbirlar hamda o‘zboshimchalik bilan qurilgan turar joylarga nisbatan mulk huquqini e’tirof etish bo‘yicha bir martalik umumdavlat aksiyasini o‘tkazish to‘g‘risida”gi farmoni hamda O‘zbekiston Respublikasi Vazirlar Mahkamasining 2018-yil 21-iyundagi “Ko‘chmas mulkka nisbatan mulk huquqini e’tirof etish bo‘yicha bir martalik umumdavlat aksiyasi doirasida ko‘chmas mulklarga nisbatan mulk huquqini e’tirof etish tartibi to‘g‘risida”gi 461-sonli qarori tufayli mamlakatda o‘zboshimchalik bilan solingan turar joylarga egalik huquqi tiklandi. Keling, bu masalaga oydinlik kiritish uchun tahlillarni Navoiy viloyati misolida ko‘ramiz.
Viloyatning davlat xizmatlari markazlariga 569 nafar fuqarodan murojaat kelib tushdi. Xodimlarning sa’y-harakati tufayli joriy yilning 1-oktabr holati bilan 49 nafar fuqaroning murojaati qanoatlantirildi. Ammo, hali ham mazkur masalada aholidan kelib tushayotgan murojaatlar ijobiy hal etilayapti, deb bo‘lmaydi. Hanuz uy-joylarga egalik huquqini berishda sansolarlik, “otangga bor, onagga bor” qabilidagi harakatlar mavjud. Bunga amin bo‘lish uchun aholidan tushgan murojaatlar natijasini o‘rgandik.
2018-yilning 11-iyulida Karmana tumanining “Bog‘ishamol” MFYda yashovchi fuqaro Baxtiyor Umarov o‘ziga tegishli o‘zboshimchalik bilan qurilgan turar joyiga nisbatan mulk huquqini e’tirof etish to‘g‘risida yozgan arizasi shu kunning o‘zidayoq markaz xodimlari tomonidan vakolatli idoraga elektron axborot almashinuvi dasturi orqali jo‘natilgan. Aniqlanishicha, mazkur murojaat Navoiy viloyat Yermulkkadastr davlat korxonasi Karmana tuman filiali rahbarining munosabat belgisi bilan filial mutaxassisi J.Olimovga ijro uchun berilgan. Ammo, ma’sul xodim fuqaroning murojaatini 12 ish kuniga kechiktirib 31-iyul kuni komissiya a’zolariga yuborgan. Xuddi shunday holat fuqarolar N.Jurakulova, A.Narziyeva, N.Xalilova, N.Rahmatova, A.Madatov, N.Abdullayevalar singari 92 nafar fuqaro murojaatiga ham qo‘llanilgan.
Vaholanki, O‘zbekiston Respublikasi Vazirlar Mahkamasining 2018- yil 21-iyundagi 461-sonli qarori bilan tasdiqlangan “Ko‘chmas mulkka nisbatan mulk huquqini e’tirof etish bo‘yicha bir martalik umumdavlat aksiyasi doirasida ko‘chmas mulklarga nisbatan mulk huquqini e’tirof etish tartibi to‘g‘risida”gi nizomning 11-bandida, komissiya ishchi organiga ariza kelib tushgandan so‘ng 3 ish kuni mobaynida murojaat etuvchining arizasida ko‘rsatilgan joyga chiqqan holda o‘zboshimchalik bilan qurilgan imoratni o‘rganib, uning texnik planini shakllantiradi hamda ushbu texnik planni komissiya a’zolariga ariza va unga ilova qilingan hujjatlar bilan birga tizim orqali yuborishi qat’iy belgilangan.
Nega 3 ish kunida ko‘rib chiqilishi lozim bo‘lgan ariza 12 va undan ortiq ish kunlariga cho‘ziladi? Demak, qonun ijrosining ataylab buzilishida bir gap bor. Mazkur qoidabuzarlikka javoban Davlat xizmatlari agentligi Navoiy viloyat boshqarmasi qarori bilan ma’sul xodim J.Olimovga nisbatan eng kam oylik ish haqining 3 baravari miqdorida, ya’ni 552 900 (besh yuz ellik ikki ming to‘qqiz yuz) so‘m jarima qo‘llanildi. Afsuski, xuddi shunday ma’muriy jazoga Konimex, Xatirchi, Nurota tumanlarining yermulkkadastr tashkiloti xodimlari ham tortildi.
Xulosa o‘rnida aytadigan bo‘lsak, hali qishloq aylanib o‘tib, odamlardan eshitganimiz shu bo‘ldi. Xalq ta’biri bilan aytadigan bo‘lsak, “zemlyamer”larning obro‘yi yanada oshganmish. To‘g‘rida, ayrim fuqarolarning 25—30 yillik armoni ushalayotganida nega tashkilot xodimlariga xushomad urmasin. Nima bo‘lganda ham davlatimizda odamlar hayotidan rozi bo‘lib yashashi uchun yaratilayotgan islohotlar ilohim barchaga yaxshilik olib kelsin.
Izoh (0)