Farg‘ona viloyatida tadbirkorlik, ishlab chiqarish hamda mehnat bozorini barqaror va muvozanatli rivojlantirish orqali joriy yilning o‘tgan davrida 64 mingdan ziyod yangi ish o‘rni yaratildi. Bu haqda “Daryo” muxbiri Azizjon Ermatov xabar berdi.
Viloyat Bandlik bosh boshqarmasidan olingan ma’lumotlarga ko‘ra, 2018-yilning yanvar–sentabr oylarida 162 mehnat yarmarkasi o‘tkazilib, 50 mingdan ziyod ish joyi taklif qilindi. 9 ming 645 fuqaroga doimiy ishga joylashish uchun yo‘llanma berildi.
Bundan tashqari, 66 ming 929 nafar fuqaro haq to‘lanadigan jamoat ishlariga jalb etildi. Hududiy Bandlikka ko‘maklashish markazlari tomonidan 24 ming 748 nafar ish izlovchi fuqaro ro‘yxatga olinib, ularning 22 ming 288 nafari ishga joylashtirildi.
Viloyatda yangi korxonalar tashkil etish va mavjudlarini kengaytirish, tadbirkorlik, kasanachilik, fermer va dehqon xo‘jaliklarida chorvachilik, parrandachilik, baliqchilik, asalarichilik va boshqa sohalarni rivojlantirish orqali yangi ish o‘rinlari ochilmoqda.
2018–2019-yillarda qurilish materiallari ishlab chiqarish sohasida umumiy qiymati 1 trillion so‘mdan ortiq 80 ga yaqin loyihani amalga oshirish hamda 2,5 mingdan ortiq yangi ish o‘rni yaratish ko‘zda tutilgan.
2018–2019-yillarda o‘nga yaqin yangi qurilish materiallari, ya’ni shurup va samorez mixlar, friz (keramik plita), DSP uchun laminat plyonkalari, folgali va metallashtirilgan plyonkalar, santexnika mahsulotlari, gazobeton, travertin ishlab chiqarish yo‘lga qo‘yilishi rejalashtirilgan.
Quvasoy shahrida “Kvars” aksiyadorlik jamiyati qiymati 60 million dollar miqdorida bo‘lgan yiliga 20 million kvadrat metr yuqori sifatli float oynasi ishlab chiqarishni yo‘lga qo‘yish evaziga 250 ta, O‘zbekiston tumanida “Turon eko sement” korxonasi 130 milliard so‘m hisobiga yiliga 700 ming tonna sement ishlab chiqarish natijasida 100 ta, Farg‘ona tumanida “Eko keramika” korxonasi tomonidan 32 milliard so‘m hisobiga yiliga 100 ming dona import o‘rnini bosuvchi santexnika mahsulotlari ishlab chiqarish asosida 180 ta va Farg‘ona shahrida “V end B Kemikal” korxonasi 26,5 milliard so‘m hisobiga yiliga 3,6 million dona keramik plitkalar ishlab chiqarishni yo‘lga qo‘yish tufayli 50 ta yangi ish o‘rni yaratish maqsad qilingan.
– 2018-yilning o‘tgan davrida ish o‘rinlari tashkil etish va aholi bandligini ta’minlash dasturi asosida 20 mingga yaqin yangi ish o‘rni yaratish rejalashtirilgan edi. Prezidentning hududlarga tashriflari davomida tasdiqlangan qo‘shimcha dastur bo‘yicha esa 71 609 ta yangi ish o‘rni tashkil etish belgilangan. Bandlik dasturini ishlab chiqishda yangi ish o‘rinlari yaratishning aniq yo‘nalishlari belgilab olingan. Yanvar–sentabr oylarida birgina iqtisodiyot tarmoqlarida yangi ishlab chiqarish quvvatlarini ishga tushirish va faoliyatini kengaytirish dasturi hisobidan 5 ming 523 yangi ish o‘rni yaratildi, – deydi viloyat Bandlik bosh boshqarmasi boshlig‘i o‘rinbosari Rustamjon Mamadaliyev.
Izoh (0)