Фарғона вилоятида тадбиркорлик, ишлаб чиқариш ҳамда меҳнат бозорини барқарор ва мувозанатли ривожлантириш орқали жорий йилнинг ўтган даврида 64 мингдан зиёд янги иш ўрни яратилди. Бу ҳақда «Дарё» мухбири Азизжон Эрматов хабар берди.
Вилоят Бандлик бош бошқармасидан олинган маълумотларга кўра, 2018 йилнинг январь–сентябрь ойларида 162 меҳнат ярмаркаси ўтказилиб, 50 мингдан зиёд иш жойи таклиф қилинди. 9 минг 645 фуқарога доимий ишга жойлашиш учун йўлланма берилди.
Бундан ташқари, 66 минг 929 нафар фуқаро ҳақ тўланадиган жамоат ишларига жалб этилди. Ҳудудий Бандликка кўмаклашиш марказлари томонидан 24 минг 748 нафар иш изловчи фуқаро рўйхатга олиниб, уларнинг 22 минг 288 нафари ишга жойлаштирилди.
Вилоятда янги корхоналар ташкил этиш ва мавжудларини кенгайтириш, тадбиркорлик, касаначилик, фермер ва деҳқон хўжаликларида чорвачилик, паррандачилик, балиқчилик, асаларичилик ва бошқа соҳаларни ривожлантириш орқали янги иш ўринлари очилмоқда.
2018–2019 йилларда қурилиш материаллари ишлаб чиқариш соҳасида умумий қиймати 1 триллион сўмдан ортиқ 80 га яқин лойиҳани амалга ошириш ҳамда 2,5 мингдан ортиқ янги иш ўрни яратиш кўзда тутилган.
2018–2019 йилларда ўнга яқин янги қурилиш материаллари, яъни шуруп ва саморез михлар, фриз (керамик плита), ДСП учун ламинат плёнкалари, фолгали ва металлаштирилган плёнкалар, сантехника маҳсулотлари, газобетон, травертин ишлаб чиқариш йўлга қўйилиши режалаштирилган.
Қувасой шаҳрида «Кварц» акциядорлик жамияти қиймати 60 миллион доллар миқдорида бўлган йилига 20 миллион квадрат метр юқори сифатли флоат ойнаси ишлаб чиқаришни йўлга қўйиш эвазига 250 та, Ўзбекистон туманида «Турон эко цемент» корхонаси 130 миллиард сўм ҳисобига йилига 700 минг тонна цемент ишлаб чиқариш натижасида 100 та, Фарғона туманида «Эко керамика» корхонаси томонидан 32 миллиард сўм ҳисобига йилига 100 минг дона импорт ўрнини босувчи сантехника маҳсулотлари ишлаб чиқариш асосида 180 та ва Фарғона шаҳрида «V and B Kemikal» корхонаси 26,5 миллиард сўм ҳисобига йилига 3,6 миллион дона керамик плиткалар ишлаб чиқаришни йўлга қўйиш туфайли 50 та янги иш ўрни яратиш мақсад қилинган.
– 2018 йилнинг ўтган даврида иш ўринлари ташкил этиш ва аҳоли бандлигини таъминлаш дастури асосида 20 мингга яқин янги иш ўрни яратиш режалаштирилган эди. Президентнинг ҳудудларга ташрифлари давомида тасдиқланган қўшимча дастур бўйича эса 71 609 та янги иш ўрни ташкил этиш белгиланган. Бандлик дастурини ишлаб чиқишда янги иш ўринлари яратишнинг аниқ йўналишлари белгилаб олинган. Январь–сентябрь ойларида биргина иқтисодиёт тармоқларида янги ишлаб чиқариш қувватларини ишга тушириш ва фаолиятини кенгайтириш дастури ҳисобидан 5 минг 523 янги иш ўрни яратилди, – дейди вилоят Бандлик бош бошқармаси бошлиғи ўринбосари Рустамжон Мамадалиев.
Изоҳ (0)