9-oktabr kuni Hyatt Regency Tashkent mehmonxonasida MAGATE, “Rosatom”, “O‘zatom” agentligi, O‘zbekiston Fanlar akademiyasi, yadro energetikasi sohasi ekspertlari, olimlari va mutaxassislari ishtirokida seminar bo‘lib o‘tadi. Unda O‘zbekistonda quriladigan ilk Atom elektr stansiyasi haqida ma’lumot berilishi kutilmoqda. Bu haqda “O‘zatom” agentligi “Daryo”ga xabar berdi.
Sentabr oyining boshida O‘zbekiston bosh vaziri Abdulla Aripov va Rossiya bosh vaziri Dmitriy Medvedev O‘zbekistonda Rossiya loyihasi bo‘yicha atom elektr stansiyasini qurishda hamkorlik qilish bo‘yicha hukumatlararo kelishuvni imzolagandi.
Iyun oyida “O‘zbekenergo” vakili AES qurilishi uchun butun mamlakat bo‘ylab 10 ga yaqin maydon ko‘rib chiqilayotganini ma’lum qilgandi.
“O‘zatom”ning “Daryo”ga ma’lum qilishicha, Rossiya prezidenti Vladimir Putinning O‘zbekistonga tashrifi doirasida Atom elektr stansiyasi qurilishi boshlanishiga bag‘ishlangan marosim bo‘lib o‘tadi. AES Navoiy yaqinida quriladi.
Eslatib o‘tamiz, Vladimir Putin 18–19-oktabr kunlari rasmiy tashrif bilan O‘zbekistonga keladi.
Izoh (0)