Abdulla Oripovning farzandlari meros talashishayotgani haqidagi gap-so‘zlarga “Darakchi” gazetasida e’lon qilingan maqolada oydinlik kiritilgan. Bu haqda UZ24 xabar berdi.
Ushbu maqola to‘lig‘icha e’tiboringizga havola qilinadi.
Fuqarolik ishlari bo‘yicha Yakkasaroy tumanlaro sudi sudyasi G‘ayrat Ergashev nashrga ma’lum qilishicha, chindan ham O‘zbekiston xalq yozuvchisi Abdulla Oripovning rafiqasi Xanifa Mustafayeva meros mulklarini bo‘lib berishni so‘rab, sudga da’vo arizasi bilan murojaat qilgan.
Da’vogar Xanifa Mustafayevaning vakili B.Eshmurodov sudga da’vo arizasi bilan murojaat qilib, javobgarlar Shoira Oripova, Yulduz Oripova, Zarifa Oripova, Mavluda Oripova, Ruxsora Oripova va Ilhom Oripovga nisbatan meros ulushlarini aniqlash va meros mulklarini bo‘lib berishni so‘ragan.
Sudning 2018-yil 18-sentabr kunidagi ajrimiga asosan, ishga Zarema Oripova mustaqil talab bilan arz qiluvchi uchinchi shaxs sifatida javobgar tomonidan jalb qilingan.
Sud majlisida so‘ralgan da’vogar Xanifa Mustafayevaning vakili B.Eshmurodov da’vo arizasini qo‘llab-quvvatlab, undagi vajlarni takrorlab, meros mulki bo‘lgan:
– Qashqadaryo viloyati, Qarshi shahar, Neftchi MFY, El ko‘chasi 3-sonli kottejdan (Ekspertiza xulosasiga ko‘ra hisobiy bozor bahosi 297.767.142 so‘m),
– Captiva rusumli avtomashinadan (hozirgi kundagi o‘rtacha bozor narxi 80.804.200 so‘m),
– Toshkent shahar, Yakkasaroy tumani, Yu.Rajabiy ko‘chasi, 72-uy, 33-xonadon (hisobiy bozor bahosi 612.164.974 so‘m)dan meros ulushlarini aniqlashni so‘ragan.
Hamda meros mulklari bo‘lgan:
– Qashqadaryo viloyati, Qarshi shahar, Neftchi MFY, El ko‘chasi, 3-sonli kottejni
– Toshkent viloyati, Qibray tumani, “Do‘rmon” QFY, Yozuvchilar ko‘chasi, 2-uyni (hisobiy bozor bahosi 472.722.039 so‘m),
Toshkent shahar, Yakkasaroy tumani, Yu.Rajabiy ko‘chasi, 72-uy, 33-xonadonni hamda Captiva rusumli avtomashinani Xanifa Mustafayevaga natura tarzida qoldirishni, qolganlarning ulushini pul miqdorida da’vogardan undirishni so‘radi.
Sud majlisida javobgar Yulduz Oripova meros mulki bo‘lgan Toshkent shahar, Yakkasaroy tumani, Yu.Rajabiy ko‘chasi, 72-uy, 33-xonadonni unga natura tarzida qoldirishni, Qarshi shahridagi kottejni, Qibray tumani, “Do‘rmon” QFY, Yozuvchilar ko‘chasidagi 2-uyni va Captiva rusumli avtomashinadan o‘z ulushini pul shaklida ajratib berilishiga e’tirozi yo‘qligini bildirdi.
Shoira Oripova va Yulduz Oripovaning vakili N.Tashpulatov Yu.Oripovaning fikrlariga qo‘shilishini, Shoira Oripova o‘z ulushini singlisi Yulduz Oripova foydasiga voz kechishi, biroq notarial tartibdagi arizasi yo‘qligini aytdi. Sh.Oripova o‘z ulushidan voz kechgan bo‘lsa-da, ushbu ulushni pullik kompensatsiya qilinishiga qarshi ekani, ulushni natura tarzida bo‘lib berishni so‘raganini bildirdi.
Sud majlisining vaqti va joyi to‘g‘risida ogohlantirilgan javobgarlar Ilhom Oripov, Zarema Oripova sud majlisida ishtirok etishmadi. Ammo sudga yozma ariza taqdim etib, ulushini pul miqdoriga olishga rozilik bildirib, fuqarolik ishini ularning ishtirokisiz ko‘rishni so‘rashgan. Ruxsora Oripova ham sudga yozma ariza taqdim qilib, otasidan qolgan da’vo ulushidan notarial tartibda onasining foydasiga voz kechganini bildirgan.
Javobgarlar Zarifa Oripova va Mavluda Oripova bugungi kunda AQShda istiqomat qilgani bois ishni ularning ishtirokisiz ko‘rishni lozim topdi.
Fuqarolik kodeksining 1112-moddasiga ko‘ra, vorislik vasiyat va qonun bo‘yicha amalga oshiriladi.
Mazkur fuqarolik ishi holatlaridan ko‘rinishicha, Abdulla Oripov va Xanifa Mustafayeva 1968-yilning 23-aprelida qonuniy nikohdan o‘tgan. Ularning 6 nafar farzandi bor.
Abdulla Oripov 2016-yilning 5-noyabrida vafot etgan.
Oila kodeksi 23-moddasining 1-qismiga ko‘ra, er va xotinning nikoh davomida orttirgan mol-mulklari ularning birgalikdagi umumiy mulki hisobalanadi. Er va xotinning umumiy daromadlari hisobiga olingan ko‘char va ko‘chmas ashyolar, ular er yoki xotindan birining nomiga rasmiylashtirilganidan qat’iy nazar er va xotinning umumiy mol-mulki hisoblanadi.
Oila kodeksi 28-moddasining 1-qismiga ko‘ra, er va xotinning umumiy mol-mulkini bo‘lishda hamda ularning shu mol-mulkdagi ulushlarini aniqlashda, agar er va xotin o‘rtasidagi nikoh shartnomasida boshqacha hol nazarda tutilmagan bo‘lsa, er va xotinning ulushlari teng, deb hisoblanadi.
2018-yil 26-sentar kuni Yakkasaroy tumanlararo sudi chiqargan hal qiluv qaroriga ko‘ra, da’vogar Xanifa Mustafayevaning vakili B. Eshmurodovning javobgarlar Sh.Oripova, Yu.Oripova, Z.Oripova, R.Oripova, I.Oripovga nisbatan meros ulushlarini aniqlash va meros mulklarini bo‘lib berish to‘g‘risidagi da’vo arizasi qanoatlantirildi.
Qarshi shahridagi kottej va Captiva avtomashinadan Mustafayeva Xanifaning ulushi 12/14 qism. Sh.Oripova va Yu.Oripovaning har birining ulushi 1/14 qismdan, Toshkent shahar Yakkasaroy tumani, Yu.Rajabiy ko‘chasi, 72-uy, 33-xonadonning 1/4 qismidan Mustafayeva Xanifaning ulushi 5/7 qism, Sh.Oripova va Yu.Oripovaning har birining ulushi 1/7 qismdan deb belgilandi.
Qarshi shahridagi kottej, “Do‘rmon”dagi uy, Captiva rusumli avtomashina hamda Toshkent shahar, Yakkasaroy tumani, Yu.Rajabiy ko‘chasi, 72-uy, 33-xonadon natura tarzida Mustafayeva Xanifa tasarrufida qoldirildi.
Merosdan olgan ulush o‘rtasidagi farq sifatida Mustafayeva Xanifadan Sh.Oripova foydasiga 82.669.704.1 so‘m va Yu.Oripova foydasiga 82.669.704.1 so‘m undirilish belgilandi.
Toshkent shahar, Yakkasaroy tumani, Yu.Rajabiy ko‘chasi, 72-uy, 33-xonadonning xususiylashtirish ulushlari hisobidan Mustafayeva Xanifadan I.Oripov va Zarema Oripovaning har biriga 153.041.243.5 so‘mdan undirilish belgilandi.
Mustafayeva Xanifadan davlat foydasiga 937.582 so‘m davlat boji undiriladigan bo‘ldi.
Sh.Oripova va Yu.Oripovaning har biridan davlat foydasiga 1.653.394 so‘mdan davlat boji undirilish belgilandi.
Mazkur hal qiluv qarori ustidan nazorat tartibida shikoyat qilinishi yoki protest keltirilishi ham mumkin.
Muhokamalarning “bosh qahramoni”ga aylangan Yulduz Oripova bu borada quyidagi fikrni bildirgan:
— Oila a’zolarimiz orasida hech qanday janjal, murosasizlik holati bo‘lgani yo‘q. Vaziyat shunday bo‘lgandi: opam va mendan boshqa farzandlar merosdagi o‘z ulushidan onamning foydasiga voz kechishgan. Ikkimizning rozi bo‘lmaganimiz bu – pul talab qildi, degani emas. Maqsadimiz, bari o‘z holicha qolishini istagandik. Opam va men hujjatga qo‘l qo‘ymaganimiz bois onam Yakkasaroy tuman sudiga merosni narxlatib, ulushlarni pul ko‘rinishida taqsimlab berishni so‘rab, da’vo arizasi kiritgan. Bu oddiy hol. Men puldan voz kechdim. Onam bilan ham munosabatlarimiz yaxshi, hech qanday mojaro bo‘lgani yo‘q. Aslida oilada meros xususida gaplashmaymiz ham. Mol-mulk talashish bizning tarbiyamizga zid. Internetdagilar ko‘proq odamning e’tiborini jalb qilish maqsadida “Abdulla Oripovning farzandlari meros talashishyapti”, deb nomimizdan foydalandi, xolos. Qonuniy merosxo‘rlar qanday meros talashishi mumkin? Bu mantiqqa zid-ku! Otamning to‘rt qator she’rini har qanday zeb-u zarlarga almashmayman. Otamning ma’naviy merosi – haqiqiy boyligim. Dunyoviy mol-mulk esa qo‘lning kiri. Hayotda o‘ylash uchun merosdan ham muhimroq narsalar bor. Hayotimdagi eng katta fojia bu – otamni yo‘qotganim. Bundan ortiq fojia yo‘q. Otamning siymosi nafaqat biz, balki butun xalqimiz uchun aziz. Otamning merosi ham xalqniki! Biz, farzandlarning vazifamiz otamning xotirasini abadiylashtirib, nomini pok saqlash! Nodonlarning shov-shuv ko‘targani achinarli holat.
Izoh (0)