O‘zbekiston Prezidenti huzuridagi Strategik va mintaqalararo tadqiqotlar instituti direktori Vladimir Norov boshchiligidagi delegatsiya joriy yilning 26—27-sentabr kunlari amaliy tashrif bilan Fransiyada bo‘ldi. Tashrif davomida Fransiya parlamenti va Tashqi ishlar vazirligi, Yevropa Parlamenti vakillari bilan muzokaralar o‘tkazildi. Bu haqda O‘zA xabar berdi.
Yevropada istiqbol va xavfsizlik instituti hamda Fransiya Ma’muriyat milliy maktabi bilan birgalikda tashkil etilgan davra suhbatida 2017—2021-yillarda O‘zbekiston Respublikasini rivojlantirishning besh ustuvor yo‘nalishi bo‘yicha Harakatlar strategiyasining amalga oshirilishi, Markaziy Osiyoda mintaqaviy hamkorlik jarayonlari hamda O‘zbekiston – Fransiya munosabatlarini yanada mustahkamlash istiqbollari muhokama qilindi.
Fransiyalik hamkorlar O‘zbekistonda ro‘y berayotgan ijobiy o‘zgarishlar, mamlakatning ijtimoiy-iqtisodiy va madaniyat hayotidagi rivojlanish tendensiyalari Parijda katta qiziqish bilan kuzatilayotganini ta’kidladi. O‘zbekistonning millatlararo totuvlik va diniy bag‘rikenglikni saqlash sohasidagi siyosati Yevropa mamlakatlari uchun namuna bo‘lib xizmat qilishi qayd etildi.
Uchrashuvlar doirasida Prezident Shavkat Mirziyoyev tomonidan iqtisodiyot va valyuta bozorini liberallashtirish, sanoatni modernizatsiya qilish, kichik va o‘rta biznesni qo‘llab-quvvatlash, sud-huquq va huquqni muhofaza qilish tizimlarini takomillashtirish, hukumat va jamiyat o‘rtasida ochiq muloqotni yo‘lga qo‘yish kabi ustuvor yo‘nalishlarda amalga oshirilayotgan islohotlar yuqori baholandi.
Fransiyalik ekspertlar O‘zbekistonda amalga oshirilayotgan jadal o‘zgarishlarni mamnuniyat bilan qayd etar ekan, Toshkentning Markaziy Osiyoda ishonch, yaxshi qo‘shnichilik va hamkorlik muhitini yaratish bo‘yicha sa’y-harakatlari alohida ahamiyatga ega ekanini ta’kidladi. Boy madaniyat, ulkan siyosiy va iqtisodiy salohiyatga ega O‘zbekiston mintaqaviy taraqqiyotning yetakchi kuchiga aylanishiga ishonch bildirildi.
O‘zbekiston Respublikasi o‘zining vazmin, ochiq va konstruktiv tashqi siyosati tufayli nafaqat mustaqilligi va suverenitetini mustahkamlamoqda, balki xalqaro imidjini ham yuksaltirmoqda. Shu ma’noda, davlat rahbari tomonidan ilgari surilgan, jumladan, Afg‘oniston muammosiga yangicha nazar bilan qarash imkonini bergan mintaqaviy va xalqaro tashabbuslar alohida qayd etildi.
Mezbonlar O‘zbekiston bilan Fransiya o‘rtasidagi siyosiy muloqot yuksak darajaga chiqqani hamda turli sohalarda ikki tomonlama munosabatlarni rivojlantirishda yuqori sur’at kuzatilayotganini ta’kidladi.
Shu munosabat bilan Parij Prezident Shavkat Mirziyoyevning bo‘lajak tashrifiga katta umid bog‘lamoqda. Bunda savdo-iqtisodiy sohada aniq natijalarga erishishga birinchi galdagi vazifa sifatida qaralmoqda. Fransiyalik ekspertlar oliy darajadagi muzokaralar mamlakatlar munosabatlarida yangi sahifa ochishiga ishonch bildirdi.
Davra suhbati yakunida O‘zbekistonning yetakchi tadqiqot markazlari bilan Yevropada istiqbol va xavfsizlik instituti, Fransiya Ma’muriyat milliy maktabi va “Yevrokontinent” tahlil markazi o‘rtasida hamkorlik to‘g‘risida memorandumlar imzolandi.
Izoh (0)