1-oktabr — O‘qituvchi va murabbiylar kuni munosabati bilan Termiz shahridagi muhtasham San’at saroyida o‘tkazilgan bayram tadbiriga viloyatning barcha hududlaridan ilg‘or o‘qituvchilar, ijodiy-ma’rifiy tanlovlarda muvaffaqiyatli ishtirok etgan pedagoglar, faxriy ustozlar taklif etildi. Bu haqda “Daryo”ga Surxondaryo viloyat axborot xizmati xabar berdi.
Tadbirda soha rivoji uchun kamarbasta bo‘lgan xodimlardan bir guruhiga viloyat hokimligining faxriy yorliq va esdalik sovg‘alari topshirildi.
Viloyat musiqali drama teatri jamoasi tomonidan qayta sahnalashtirilgan “Alisher Navoiy” spektakli namoyishi boshlanganda tomoshabinlar O‘zbekiston va Qoraqalpog‘iston xalq artisti Muhammadali Abduqunduzovning chiqishini gulduros qarsaklar bilan olqishlashdi. Muvaffaqiyatli sahnalashtirilgan spektakl davomida insonlar baxt-u saodati, xalq farovonligi, mamlakat obodonligi uchun ulkan hissa qo‘shgan Alisher Navoiy obrazi talqini o‘qituvchi va murabbiylarni ulug‘ shoir shaxsiga yanada yaqinlashtirdi.
Shundan so‘ng bayram tadbiri to‘kin dasturxon atrofida davom etdi. Ilm-u ma’rifat charog‘bonlari – o‘qituvchi va murabbiylarga bildirilgan samimiy tilaklar-u tabriklar qo‘shiq va raqslar guldastasiga ulanib ketdi. San’at ustalari va iste’dodli yosh ijrochilar ishtirokidagi konsert namoyishi bayram tarovatiga o‘zgacha kayfiyat, quvonch bag‘ishladi.
Tantanali tadbirda Surxondaryo viloyati hokimi Bahodir Po‘latov ishtirok etdi.
Izoh (0)