O‘zbekistonda 15-sentabrdan boshlab qolipli (“bulka”) non narxining davlat tomonidan tartibga solinishi bekor qilingan edi. Vazirlar Mahkamasi qaroriga binoan bulka non ayni paytda erkin bozor narxi bo‘yicha sotilmoqda, deb yozadi “Turon24”.
Mazkur qaror ortidan qolipli nonlarning narxi qariyb ikki barobar oshib, 650 so‘mdan 1200 so‘mga ko‘tarildi. Bundan tashqari, unning erkin bozor narxi bo‘yicha sotilayotgani boshqa mahsulotlarning tannarxi qimmatlashishiga olib keldi. Nashr muxbirlari hududlardagi narx-navoni o‘rgandi. O‘rganish natijalarini quyidagi jadvalda ko‘rish mumkin:
“O‘zdonmahsulot” kompaniyasi bosh iqtisodchisi Erkin Esonovning aytishicha, non narxi “elektr ta’minoti va boshqa ko‘plab narsalarning narxi yuqorilagani” uchun ham o‘sgan.
“Toshkentnon” ishlab chiqaruvchilar uyushmasi bosh hisobchisi Ruslan Musretov “Xalq so‘zi”ga bergan intervyusida non narxi joriy yilning noyabridan yana oshishi mumkinligini ma’lum qilgandi. “O‘zdonmahsulot”ning Strategik rejalashtirish va biznesni rivojlantirish boshqarmasi boshlig‘i Akramjon Azizovning aniqlik kiritishicha, noyabr oyiga borib bulka nonning narxi taxminan 2200 so‘mgacha ko‘tarilishi kutilmoqda.
Ma’lumot uchun: O‘zbekistonda qolipli non narxi oxirgi marta 2014-yil sentabrda 50 so‘mga qimmatlab, 650 so‘m etib belgilangan edi.
Eslatib o‘tamiz, 2018-yil 1-oktabrdan boshlab aholining ijtimoiy himoyaga muhtoj qatlamlariga un va qolipli non olish bo‘yicha qo‘shimcha xarajatlarni qoplash uchun eng kam oylik ish haqining 10 foizi (18400 so‘m) miqdorida tovon to‘lanadi.
Izoh (0)