O‘zbekiston Prezidenti huzuridagi Strategik va mintaqalararo tadqiqotlar institutida 27-sentabr kuni Yevropada xavfsizlik va hamkorlik tashkiloti Parlament Assambleyasi Daniya delegatsiyasi bilan uchrashuv bo‘lib o‘tdi. Bu haqda O‘zA xabar berdi.
Muloqot chog‘ida delegatsiya a’zolariga O’zbekistonda amalga oshirilayotgan keng ko‘lamli islohotlar, Markaziy Osiyo mintaqasi mamlakatlari bilan tashqi siyosatni amalga oshirishdagi tamoyil va yondashuvlar haqida atroflicha ma’lumot berildi.
YXHT Parlament Assambleyasi vakillari O‘zbekistonda samarali boshqaruv tizimini joriy qilish bo‘yicha qator chora-tadbirlar amalga oshirilayotgani, qonun ustuvorligi, inson huquq va erkinligini ta’minlash bo‘yicha ijobiy natijalarga erishilganini qayd etdi. Jamiyatda tajovuzkor ekstremizm va radikalizmning barcha ko‘rinishlariga qarshi kurashishning umume’tirof etilgan tamoyillari joriy qilinayotgani yuqori baholandi.
Ta’kidlanganidek, O‘zbekiston tashqi va ichki siyosatida pragmatik va konstruktiv siyosatning olib borilayotgani mamlakat imijini mustahkamlash imkonini beradi.
Tadbirda O‘zbekiston — YXHT o‘rtasidagi hamkorlikni har tomonlama mustahkamlash va rivojlantirish zarurligi qayd etildi.
Peter Yuel Yensen boshchiligidagi YXHT Parlament Assambleyasining Daniya delegatsiyasi a’zolari “Taraqqiyot strategiyasi” markazida ham muzokaralar o‘tkazdi.
Uchrashuvda markaz faoliyati, mamlakatda ijtimoiy-siyosiy va iqtisodiy sohalardagi islohotlarning borishi haqida so‘z yuritildi.
Mehmonlarga 2017—2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol tadbirkorlik, innovatsion g‘oyalar va texnologiyalarni qo‘llab-quvvatlash yili”da amalga oshirish jarayoni haqida ma’lumot berildi.
Markazning faoliyat yo‘nalishlari, amalga oshirilayotgan qo‘shma loyihalar, Davlat dasturida ko‘zda tutilgan chora-tadbirlar bajarilishi bo‘yicha jamoatchilik fikrining o‘rganilishi mehmonlarda qiziqish uyg‘otdi.
Davlat organlari va fuqarolar o‘rtasidagi ochiq muloqotni ta’minlash mamlakatda davlat va jamiyat boshqaruvi sohasidagi islohotlarning tub mohiyatini tashkil qiladi.
Muloqotda mamlakatda davlat idoralarining ochiqligini ta’minlash, fuqarolar huquqlarini himoya qilish borasida xalqaro tashkilotlar bilan faol hamkorlik aloqalari izchil rivojlanayotgani ta’kidlandi. Qonun ustuvorligini ta’minlash, fuqarolarni jamiyatda kechayotgan o‘zgarish va yangilanishlarning to‘laqonli ishtirokchisiga aylantirish kabi yo‘nalishlardagi ishlar yuzasidan fikr almashildi.
Mehmonlar poytaxtdagi diqqatga sazovor joylarda bo‘lib, istiqlol tarixi, boy madaniy merosni asrab-avaylash yo‘lidagi ezgu ishlar bilan tanishdi.
Izoh (0)