“Fan to‘g‘risida”gi qonun loyihasida qanday yangiliklar kutilmoqda?

“Adolat” sotsial demokratik partiyasi tomonidan Toshkent davlat iqtisodiyot universiteti qoshidagi akademik litseyda bo‘lib o‘tgan davra suhbati “Fan to‘g‘risida”gi qonun loyihasi muhokamasiga bag‘ishlandi. Bu haqda O‘zA xabar berdi.

Mamlakatda ilm-fan sohasini davlat tomonidan qo‘llab-quvvatlash, sohaning jadal rivojlanishini ta’minlash, jamiyat va davlat hayotiga, xususan, iqtisodiyotning barcha jabhalariga zamonaviy fan yutuqlarini joriy etish, mutaxassislarga sharoitlar yaratish, ularning mehnatini moddiy va ma’naviy rag‘batlantirishga qaratilgan keng ko‘lamli ishlar amalga oshirib kelinmoqda.

Shunga qaramay mazkur sohada hali yechimini kutayotgan masalalar ko‘p. Jumladan, ilm-fan sohasini jadal rivojlantirishda dunyoning eng ilg‘or davlatlari qatoriga qo‘shilish uchun sohaning huquqiy asoslarini yanada mustahkamlash, ya’ni, alohida qonun qabul qilish taqozo etilmoqda.

“Fan to‘g‘risida”gi qonun loyihasining muhokamaga ko‘yilishidan ko‘zlangan asosiy maqsad qonunni bevosita ilmiy jamoatchilikning fikr, takliflari asosida maromiga yetkazish, unda belgilanayotgan normalarning amaliyot bilan uyg‘unligini ta’minlash, bugun O‘zbekiston ilm-fani oldida turgan dolzarb muammolarning yechimini ko‘rsatish barobarida uning istiqboldagi taraqqiyotini belgilab olishga qaratilgan.

Qayd etilganidek, “Fan to‘g‘risida”gi qonun loyihasi avvalo sohaga doir atamalarni bir xil talqin qilishga imkon beradigan tushunchalar va me’yorlarni o‘z ichiga olgan. Uning muhim jihatlaridan biri – ilmiy faoliyat sohasida davlat siyosatining asosiy yo‘nalishlari aks ettirilayotganidir. Mazkur qonun loyihasining soha rivojidagi o‘ziga xosligining yana bir ko‘rinishi bu – ilmiy g‘oyalardan foydalanish imkoniyatlarini kengaytirish hamda xalqaro hamkorlik va chet el investitsiyalarini jalb etish, ilmiy kadrlarga qo‘yilgan zamonaviy talablar, ularning ijtimoiy-huquqiy himoyasi, fan, ta’lim va amaliyot uyg‘unligini ta’minlashga oid qoidalarning nazarda tutilganligidir.

Muhokamalar jarayonida bildirilgan takliflar, fikr-mulohazalar asosida tegishli tavsiyalar ishlab chiqildi.