«Адолат» социал демократик партияси томонидан Тошкент давлат иқтисодиёт университети қошидаги академик лицейда бўлиб ўтган давра суҳбати «Фан тўғрисида»ги қонун лойиҳаси муҳокамасига бағишланди. Бу ҳақда ЎзА хабар берди.
Мамлакатда илм-фан соҳасини давлат томонидан қўллаб-қувватлаш, соҳанинг жадал ривожланишини таъминлаш, жамият ва давлат ҳаётига, хусусан, иқтисодиётнинг барча жабҳаларига замонавий фан ютуқларини жорий этиш, мутахассисларга шароитлар яратиш, уларнинг меҳнатини моддий ва маънавий рағбатлантиришга қаратилган кенг кўламли ишлар амалга ошириб келинмоқда.
Шунга қарамай мазкур соҳада ҳали ечимини кутаётган масалалар кўп. Жумладан, илм-фан соҳасини жадал ривожлантиришда дунёнинг энг илғор давлатлари қаторига қўшилиш учун соҳанинг ҳуқуқий асосларини янада мустаҳкамлаш, яъни, алоҳида қонун қабул қилиш тақозо этилмоқда.
«Фан тўғрисида»ги қонун лойиҳасининг муҳокамага кўйилишидан кўзланган асосий мақсад қонунни бевосита илмий жамоатчиликнинг фикр, таклифлари асосида маромига етказиш, унда белгиланаётган нормаларнинг амалиёт билан уйғунлигини таъминлаш, бугун Ўзбекистон илм-фани олдида турган долзарб муаммоларнинг ечимини кўрсатиш баробарида унинг истиқболдаги тараққиётини белгилаб олишга қаратилган.
Қайд этилганидек, «Фан тўғрисида»ги қонун лойиҳаси аввало соҳага доир атамаларни бир хил талқин қилишга имкон берадиган тушунчалар ва меъёрларни ўз ичига олган. Унинг муҳим жиҳатларидан бири – илмий фаолият соҳасида давлат сиёсатининг асосий йўналишлари акс эттирилаётганидир. Мазкур қонун лойиҳасининг соҳа ривожидаги ўзига хослигининг яна бир кўриниши бу – илмий ғоялардан фойдаланиш имкониятларини кенгайтириш ҳамда халқаро ҳамкорлик ва чет эл инвестицияларини жалб этиш, илмий кадрларга қўйилган замонавий талаблар, уларнинг ижтимоий-ҳуқуқий ҳимояси, фан, таълим ва амалиёт уйғунлигини таъминлашга оид қоидаларнинг назарда тутилганлигидир.
Муҳокамалар жараёнида билдирилган таклифлар, фикр-мулоҳазалар асосида тегишли тавсиялар ишлаб чиқилди.
Изоҳ (0)